შინაგან საქმეთა მინისტრის მოადგილის განცხადებით, საარჩევნო უბნებზე სირცხვილის დერეფნების მოწყობა სიტყვისა და გამოხატვის თავისუფლების ფარგლებს სცდება და შეიცავს სისხლის სიმართლის კოდექსით გათვალისწინებული დანაშაულის ნიშნებს. კახა საბანაძის თქმით, იმ შემთხვევაში, თუ რომელიმე პოლიტიკური ჯგუფი ამას გააკეთებს, პოლიციას შესაბამისი რეაგირება ექნება.

"ხაზგასმით აღვნიშნავთ, რომ საარჩევნო უბნებზე სირცხვილის დერეფნების მოწყობა, თავისი შინაარსით, აშკარად სცდება კონსტიტუციით გარანტირებულ სიტყვისა და გამოხატვის კანონით დადგენილ ჩარჩოებს, არღვევს მოქალაქის კონსტიტუციით გარანტირებულ უფლებას, საფრთხეს უქმნის საზოგადოებრივ უსაფრთხოებას და შეიცავს სისხლის სამართლის კოდექსით გათვალისწინებული დანაშაულის ნიშნებს, რადგან ერთმნიშვნელოვნად მიზნად ისახავს საარჩევნო ნების განხორციელებისთვის ხელის შეშლას და პირდაპირ ზემოქმედებას ახდენს ამომრჩეველზე, რათა თავისი ნების საწინააღმდეგოდ უარი თქვას არჩევნებში მონაწილეობის მიღებაზე. შინაგან საქმეთა სამინისტრო მოუწოდებს შესაბამის პოლიტიკური ჯგუფების წარმომადგენლებს, მათი მხრიდან სისხლის სამართლის კოდექსით გათვალისწინებული ქმედების განხორციელების შემთხვევაში, პოლიცია მოახდენს მყისიერ რეაგირებას და იქნება შესაბამისი პროცედურები წარმართული", — განაცხადა საბანაძემ.

მან მოუწოდა პოლიტიკოსებს, დაიცვან კანონი, დაემორჩილონ პოლიციის კანონიერ მოთხოვნებს და ხელი შეუწყონ არჩევნების მშვიდ გარემოში ჩატარებას.

"პოლიცია არ დაუშვებს საარჩევნო პროცესის ძალადობრივი სცენარით განვითარებას და მკაცრ რეაგირებას მოახდენს სამართალდარღვევის ნებისმიერ ფაქტზე. პოლიცია დაიცავს თითოეული მოქალაქის კონსტიტუციით მინიჭებულ უფლებას, იყოს სახელმწიფოში ხელისუფლების წყარო, საკუთარი პოლიტიკური არჩევანი გააკეთოს მშვიდ და უსაფრთხო გარემოში", — განაცხადა საბანაძემ.

საქართველოში საპარლამენტო არჩევნების მეორე ტური 21 ნოემბერსაა დანიშნული. ოპოზიცია მასში არ მონაწილეობს, რადგან 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. რიგგარეშე არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

15 ნოემბერს ბათუმში გამართულ საპროტესტო აქციაზე ნაციონალური მოძრაობის წევრმა, ლევან ვარშალომიძემ მხარდამჭერებს მოუწოდა, რომ 21 ნოემბერს საარჩევნო უბნებთან სირცხვილის დერეფნები გააკეთონ. მისი ეს პოზიცია გააკრიტიკეს პარტიის ლიდერებმა, ხატია დეკანოიძემ და სალომე სამადაშვილმა. ამ იდეას არ იზიარებენ არც ოპოზიციურ ერთობაში შემავალი სხვა პარტიები. მოგვიანებით, ენმ-ის ბათუმის ორგანიზაციაში განმარტეს, რომ "სირცხვილის კორიდორი იქნება მხოლოდ მაღალი თანამდებობის პირებისთვის და არა ამომრჩევლებითვის".