მოქალაქეები საქართველოს პარლამენტსა და ჯანდაცვის სამინისტროს მანიფესტით მიმართავენ, რომ ხალისუფლების და დარგის პროფესიონალების თანამშრომლობით, შეიცვალოს ბიუჯეტი ფსიქიატრიულ პაციენტთა ინტერესებისა და უფლებების დაცვის სასარგებლოდ.

მათი განცხადებით, დარგის სპეციალისტთა აზრით დაუშვებელია რეფორმის შედეგად შექმნილი ფსიქიატრიული სერვისის გაუქმება დაფინანსების მოდელის "გაუაზრებელი ცვლილების" გამო:

"2017 წლის 3 იანვარს ფსიქიატრიული მომსახურება მოულოდნელად დადგა ნეგატიური ცვლილებების წინაშე. ჯანმრთელობის პროგრამის დაფინასების წესის დაუგეგმავმა ცვლილებამ გამოიწვია ფსიქიატრიული სერვისების კოლაფსი და მნიშვნელოვანი დარტყმა მიაყენა ფსიქიკური პრობლემების მქონე ადამიანების ჯანმრთელობის დაცვას.

მწვავე ფსიქიკური აშლილობების მკურნალობისთვის გამოყოფილი თანხები დაახლოებით 40% შემცირდა, რის გამოც თბილისში ზოგადი პროფილის საავადმყოფოებში მოქმედი სამი ფსიქიატრიული განყოფილება იძულებული გახდა შეეწყვიტა პაციენტების მიღება და გაეუქმებინა 90 მწვავე საწოლი.

თბილისში მომსახურებას განაგრძობს მხოლოდ ორი ფსიქიატრიული კლინიკა, რომელიც არის გადავსებული და, შესაბამისად, სასწრაფო დახმარების ბრიგადასაც კი უარს ეუბნება პაციენტების მიღებაზე. შედეგად ფსიქიატრიული დახმარების საჭიროების მქონე ადამიანები რჩებიან მომსახურების გარეშე".

რამდენიმე დღის წინ, ცნობილი გახდა, რომ ღუდუშაურის სახელობის ეროვნული სამედიცინო ცენტრი, სახელმწიფო პროგრამის ფარგლებში, ფსიქიკური პრობლემების მქონე პაციენტებს აღარ მოემსახურება. თუმცა, კლინიკა ამ სერვისს სხვა პაციენტებს კვლავ სთავაზობს და პროგრამის გარეთ მყოფი პაციენტების მიღება არ გამოირიცხება.