ინფექციური საავადმყოფოს დირექტორის, თენგიზ ცერცვაძის განცხადებით, სიკვდილიანობის ანალიზისას გამოიკვეთა, რომ ლეტალობის მნიშვნელოვანი რაოდენობა მოდის ისეთ პაციენტებზე, რომლებმაც ყურადღება არ მიაქციეს თავიანთ რესპირატორულ ავადმყოფობას და მხოლოდ მდგომარეობის უკიდურესი დამძიმების შემდეგ მიმართეს ექიმს.

"ჩვენ გავაკეთეთ სიკვდილიანობის ანალიზი და ამაზე ვმსჯელობდით, რომ სიკვდილიანობის შემთხვევების მნიშვნელოვანი რაოდენობა მოდის იმ პაციენტებზე, რომლებიც დარჩნენ ბინაზე ან არ მიაქციეს ყურადღება თავიანთი რესპირაციული სიმპტომებით მიმდინარე ავადმყოფობას, ცხელებით მიმდინარე ავადმყოფობას და უკიდურესად დამძიმების შემდეგ მიმართეს მხოლოდ ექიმს და მოთავსდნენ საავადმყოფოში, პრაქტიკულად უკვე ტერმინალურ სიტუაციაში, როცა მათი გადარჩენა ვერ ხერხდება", — აცხადებს თენგიზ ცერცვაძე.

ინფექციონისტის განმარტებით, ის საუბრობს იმ პაციენტებზე, რომელთაც არ სჯეროდათ კოვიდის არსებობის და ფიქრობდნენ, რომ მათ ეს სიმპტომები ადრეც ჰქონდათ და გაუვლიდათ.

"მე სხვა კატეგორიაზე ვამბობ, ვინც არ მიმართა ექიმს, იმიტომ, რომ არ სჯეროდა კოვიდის არსებობის, არ ეგონა მას რომ დაავადება სჭირდა ტემპერატურის მომატებით და სხვადასხვა რესპირატორული სიმპტომებით ის კოვიდი იქნებოდა, ფიქრობდა რომ მას ეს ხშირად ჰქონია და გაუვლის და კიდევ ახლობლების რჩევით და რეკომენდაციებით იტარებდა თვითმკურნალობას და სხვა", — ამბობს ცერცვაძე.