ევროპული საქართველოს წევრის, გიორგი კანდელაკის განცხადებით, არჩევნების დღეს მარნეულის 65-ე უბანზე ეუთოს დამკვირვებელზე ფიზიკური ანგარიშსწორებით დაემუქრნენ.

კანდელაკის თქმით, არჩევნების დღეს, მარნეულის 65-ე უბანზე შევიდა საკრებულოს თანამშრომელი, ელშან გასანოვი, რომელმაც მაგიდაზე დაყარა ბიულეტენების დასტა და განაცხადა, რომ მან ეს ბიულეტენები იატაკზე იპოვა.

მისი განმარტებით, ამ ფაქტს შეესწრო ეუთოს გრძელვადიანი დამკვირვებელი, კირა კაურინკოსკი, რომელსაც აღნიშნული ფაქტი გააპროტესტა, რა დროსაც ქართული ოცნების წარმომადგენლები მას ფიზიკური ანგარიშსწორებით დაემუქრნენ.

"ეუთოს გრძელვადიან დამკვირვებელს ფიზიკური ანგარიშსწორებით დაემუქრნენ იქ მყოფი ქართული ოცნების წარმომადგენლები, ადგილი ჰქონდა გაწევ-გამოწევას და ეს დასტა ბიულეტენებისა, სადაც შემოხაზული იყო 41 ნომერი, საბოლოოდ მიათვალეს ხმების საბოლოო რაოდენობას", — ამბობს კანდელაკი.

მარნეულის საოლქო საარჩევნო კომისიის თავმჯდომარე ანა ილურიძე ამბობს, On.ge-სთან ამბობს, რომ აღნიშნული შემთხვევის შესახებ მან არაფერი იცის, გარდა ამისა, არჩევნების დღესაც საჩივრით არავის მიუმართავს, რომ რეაგირება მოეხდინათ.