სომხეთის პრემიერმინისტრის, ნიკოლ ფაშინიანის განცხადებით, მთიანი ყარაბაღის შესახებ შეთანხმების გაფორმების გადაწყვეტილება მას შემდეგ მიიღო, რაც ამის აუცილებლობას არმია დაჟინებით მოითხოვდა. ფაშინიანმა ამის შესახებ ფეისბუქმიმართვის დროს ისაუბრა და მის სიტყვებს BBC-ის რუსული ბიურო ციტირებს.

"გადაწყვეტილება მივიღე მას შემდეგ, რაც არმია დიდი ხნის განმავლობაში ამტკიცებდა აღნიშნული ნაბიჯის აუცილებლობის შესახებ. არმიაში ამბობდნენ, რომ უნდა გავჩერდეთ, არის გარკვეული პრობლემები, რომელთან მოგვარებისთვის ან არ ჩანს პერსპექტივა, ან რესურსები ამოიწურა", — განაცხადა ფაშინიანმა.

გარდა ამისა, სომხეთის ლიდერი აცხადებს, რომ ომის გაგრძელებისთვის ქვეყანაში რეზერვის მობილიზების პრობლემა იყო.

შეთანხმების თანახმად, მთიანი ყარაბაღის ზონაში ცეცხლი შეწყვეტილი უკვე უნდა იყოს, თუმცა ფაშინიანი ამბობს, რომ საბრძოლო მოქმედებები ჯერ კიდევ გრძელდება.

"სამწუხაროდ, საბრძოლო მოქმედებები მთლიანად დასრულებული არაა. ჩვენ ვიმედოვნებთ, რომ ისინი საბოლოოდ შეწყდება", — აღნიშნა ფაშინიანმა.

საბრძოლო მოქმედებების შეწყვეტასთან დაკავშირებით განცხადება სომხეთის შეუარაღებულმა ძალებმაც გაავრცელეს. განცხადებაში აღნიშნულია, რომ არმიამ ყველაფერი გააკეთა, თუმცა ახლა "სისხლისღვრის დასრულების დროა".

9 ნოემბერს გვიან ღამით სომხეთმა და აზერბაიჯანმა მთიან ყარაბაღში ომის დასრულების შესახებ შეთანხმებას ხელი მოაწერეს. სომხეთში შეთანხმება კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. მას ოპერაცია ჩაუტარდა. ერევნისგან განსხვავებით, ბაქოში შეთანხმებას სიხარულით შეხვდნენ.

სამმხრივ დოკუმენტს ხელი სომხეთის პრემიერმინისტრმა, ნიკოლ ფაშინიანმა, აზერბაიჯანის პრეზიდენტმა, ილჰამ ალიავმა და რუსეთის პრეზიდენტმა ვლადიმერ პუტინმა მოაწერეს ხელი. შეთანხმების თანახმად, სომხური მხარე აზერბაიჯანს კონფლიქტის ზონაში რამდენიმე ტერიტორიას გადასცემს, მთიან ყარაბაღში ბრუნდებიან დევნილები, კონფლიქტის ხაზის გასწვრივ კი რუსი სამშვიდობოები განლაგდებიან. რა სტატუსი ექნება მთიანი ყარაბაღის რეგიონს, შეთანხმებაში არ წერია.

ილჰამ ალიევი ამბობს, რომ რუსი სამხედროების გარდა ზონაში თურქი მშვიდობისმყოფელებიც იქნებიან. მან შეთანხმებას ისტორიული უწოდა და აღნიშნა, რომ ეს სომხეთის კაპიტულაციას ნიშნავს.

ფაშინიანი კი აღნიშნავს, რომ შეთანხმების ხელმოწერის გარდა, სხვა გზა არ ჰქონდა. როგორც ის განმარტავს, გადაწყვეტილება ანალიზის შედეგად მიიღეს.

ამავე თემაზე: