ყველასთვის მოულოდნელად, 15 წლის შემდეგ პირველად, მძიმე მეტალის შემსრულებელი სომხურ-ამერიკული ჯგუფი System of a Down ახალი მუსიკით დაბრუნდა.

აღიარებისა და წარმატების მიუხედავად — ჯგუფის უხეში, ზესწრაფი რიტმებით დასერილი მღელვარე მელოდიები ათასწლეულის ცვლის მუსიკალურ გაფორმებად იქცა — System of a Down 2006 წლის შემდეგ დიდწილად აღარ აქტიურობდა.

"ჩვენ, ალბათ, ერთადერთი როკ-ჯგუფი ვართ, რომელსაც მთავრობები ემტერებიან; ერთადერთი როკ-ჯგუფი, რომელიც ომშია; ამიტომაც ეს სიმღერები დავწერე და მსურს, ჩვენი ჯარისკაცებისა და მთელ მსოფლიოში მყოფი სომხების სულისკვეთება ავამაღლო", — განაცხადა ჯგუფის ვოკალისტმა და გიტარისტმა დარონ მალაქიანმა.

ჯგუფმა გუშინ ღამით, 5 ნოემბერს, სომხეთ-აზერბაიჯანის მიმდინარე კონფლიქტის პასუხად ორი ახალი სიმღერა გამოუშვა: "Protect the Land" და "Genocidal Humanoidz".

ჯგუფის ახალი მუსიკა მიმართულია "იმ საზარელი და სერიოზული ომისკენ, რომელსაც არცახისა და სომხეთის ჩვენი კულტურული სამშობლოების მიმართ დანაშაულებრივად ახორციელებენ".

"სასწრაფო და კრიტიკული დახმარების საჭიროების მქონეთა" დასახმარებლად, აგრეთვე საბაზისო საჭიროებების უზრუნველსაყოფად, System of a Down აცხადებს, რომ ახალი სიმღერების გაყიდვებიდან მიღებულ თანხას მთლიანად აშშ-ში არსებულ საქველმოქმედო ორგანიზაცია Armenia Fund-ს შეწირავენ, რომელიც მთიან ყარაბაღისა და სომხეთის ტერიტორიაზე საჭიროების მქონე ხალხის დახმარებაზეა ორიენტირებული.

"გვესმის, რომ უფრო მოსახერხებელი გზებიც არსებობს, რითაც მუსიკის მოსმენა შეგიძლიათ. ამიტომ გთხოვთ, პირველ ყოვლისა ეს სიმღერები ქველმოქმედებისთვის ჩამოტვირთოთ. მუსიკა და ტექსტი თავიანთ სათქმელს ამბობენ. გვჭირდება, რომ არცახის სათქმელი თქვენ თქვათ", — განაცხადა ჯგუფმა.

ახალი სიმღერების შეძენა და მოსმენა ჯგუფის Bandcamp-ზე შეგიძლიათ.