ქართული ოცნების ერთ-ერთი ლიდერის, მამუკა მდინარაძის განცხადებით, არჩევნების დღეს სპეციალურ უბანზე ტექნიკური ხარვეზები დაფიქსირდა. ის ხარვეზებს იმით განმარტავს, რომ კორონავირუსით ინფიცირებულ და იზოლირებულ ამომრჩევლებთან მუშაობას სპეციფიკური ცოდნა ესაჭიროება, რაც კომისიის წევრებს არ ჰქონდათ. მისივე თქმით, დაუტრენინგებელი კომისიის წევრები ქვეყნის მასშტაბით რამდენიმე ასეული იყო.

"სპეც. უბნებში კომისიის ძველი წევრები ახალი, პრაქტიკულად დაუნტრენინგებელი წევრებით იყვნენ ჩანაცვებულნი და ტექნიკური შეცდომები იყო ძალიან ბევრი. ხაზგასმით ვაცხადებთ, რომ ეს ხარვეზები არის ტექნიკური და პარტიას არავითარ უპირატესობას აძლევს. ესეც ნებისმიერ შემთხვევაში გადამოწმებადია", — განაცხადა მდინარაძემ.

ქართული ოცნების წარმომადგენელმა, აგრეთვე, ოქმებში არსებული დისბალანსი განმარტა. მდინარაძე ამბობს, რომ სპეციალური ყუთების მაჟორიტარულ ოქმებში, ფაქტობრივად, ყველგან ფიქსირდება დისბალანსი და ეს არის სრულიად ბუნებრივი, რადგან ოქმებში ინფიცირებული ან იზოლაციაში მყოფი ამომრჩევლების მხოლოდ ნაწილი დაემთხვა ისეთ ამომრჩეველს, რომელიც იმავე რაიონში იყვნენ ჩაწერილები, სადაც ხმას აძლევდნენ.

"ასეთი ამომრჩევლები მხოლოდ პარტიებს აძლევდნენ ხმას, მაჟორიტარულ კანდიდატებს კი მხოლოდ იმ ოლქში მაცხოვრებელი იზოლირებული პირი აძლევდა, თუ დაემთხვეოდა მხოლოდ იმ შემთხვევაში. ამიტომ მაჟორიტარის ოქმში გაცილებით ნაკლები ხმის მიმცემია დაფიქსირებული, ვიდრე ამომრჩევლის რაოდენობაა დაფიქსირებული ე.წ. სპეც. უბანზე", — ამბობს მდინარაძე.

მან, ასევე, აღნიშნა, რომ საქართველოზე ბევრად დიდმა ქვეყნებმა იზოლაციაში მყოფ და ინფიცირებულ პაციენტების ხმის მიცემის რეალიზაცია კორონავირუსის პანდემიის გამო საერთოდ ვერ მოახერხეს.

ოპოზიციური პარტიის წარმომადგენლები აცხადებენ, რომ საუბნო საარჩევნო კომისიების კენჭისყრის შედეგების შემაჯამებელ ოქმებში ხარვეზები და დისბალანსია.

ოქმებში არსებულ დისბალანსს გამოეხმაურა ცესკოც. მათი განმარტებით, სპეციალურ სიაში მყოფ ყველა ამომრჩეველს კანონმდებლობით არ აქვს შესაძლებლობა აირჩიოს მაჟორიტარი, თუ ის კონკრეტული მაჟორიტარული ოლქის ამომრჩეველი არ არის. მათი თქმით, სწორედ ამიტომ ვერ დაემთხვა და დაემთხვევა არჩევნებში ამომრჩეველთა რაოდენობა მაჟორიტარობის კანდიდატებისთვის მიღებულ ხმათა რაოდენობასა და ბათილი ბიულეტენების ჯამს. ცენტრალური საარჩევნო კომისიის წარმომადგენელმა აღნიშნული დისბალანსი პენიტენციურ დაწესებულებაში შექმნილი საარჩევნო უბნის ოქმის მაგალითხზე ახსნა.

31 ოქტმბრის არჩევნების ცესკოს გამოცხადებულ შედეგებს ოპოზიცია არ აღიარებს. პარტიებმა საკანონმდებლო ორგანოში შესვლაზე უარი უკვე თქვეს.

პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა.