დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ქვეყანაში მილიონ მოსახლეზე ინფიცირებულთა რაოდენობა 8 ათასამდეა. მისი თქმით, დაახლოებით, 20-მდე ქვეყანაა, რომელთა ეს მონაცემებიც საქართველოზე მეტია.

"სადღაც, ევროპის შუაგულში ვართ ახლა. დაახლოებით, 20-მდე ქვეყანაა ჩვენზე ზემოთ, უფრო მეტი აქვთ მილიონ მოსახლეზე ინფიცირებულთა რაოდენობა. ჩვენი მონაცემები, ამ შემთხვევაში, უფრო ნაკლებია, საშუალოა. შუაში ვართ ევროპის რეგიონში. ახლა გვაქვს 8 ათასამდე მილიონ მოსახლეზე ინფიცირებული", — განაცხადა გამყრელიძემ.

მისი თქმით, "ზოგიერთ ჩვენს მეზობელს" მილიონ მოსახლეზე ინფიცირებულთა 15-20 ათასი შემთხვევა აქვს, თუმცა გამყრელიძის განმარტებით ეს მათ "დამშვიდების" საშუალებას მაინც არ აძლევთ, რადგან ახალი შემთხვევების რიცხვი ყოველდღიურად იზრდება.

ამასთან, დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელის, ხათუნა ზახაშვილის განცხადებით, მსოფლიოს მასშტაბით საქართველო, დაახლოებით 74-ე ადგილზე გამოდის.