სახალხო ულტიმატუმის ვადა ამოიწურა — ბელარუსში მუშებმა, სტუდენტებმა და პენსიონერებმა საყოველთაო გაფიცვები დაიწყეს. ბელარუსის ოპოზიციის ლიდერ, სვეტლანა ტიხანოსვკაიას განცხადებით, სახელმწიფო ქარხნებისა და საწარმოების მუშები, ტრანსპორტის თანამშრომლები, მეშახტეები, მასწავლებლები და სტუდენტები გაფიცვებში დღეს დილიდან მონაწილეობენ. საღამოს კი ტიხანოვსკაიამ თავის ტელეგრამ არხზე მოქალაქეებს გამოხატული უზარმაზარი სოლიდარობისთვის მადლობა გადაუხადა.

"დღეიდან ეროვნული გაფიცვები დაიწყება, რაც იქნება ნაბიჯი თავისუფლების, ძალადობის შეწყვეტისა და ხელახალი არჩევნების დასაწყისისა ბელარუსი ხალხისთვის. ადამიანებმა, რომლებმაც გაფიცვები დაიწყეს, უნდა დავანახოთ, რომ ისინი მარტო არ არიან", — წერს ტიხანოვსკაია საკუთარ ტელეგრამ არხზე.

ტიხანოვსკაიამ ბელარუსის პრეზიდენტ ალექსანდრე ლუკაშენკოს სახალხო ულტიმატუმი 13 ოქტომბერს წაუყენა, რომლის ვადა გუშინ, 25 ოქტომბერს ამოიწურა. ულტიმატუმის მიხედვით, ლუკაშენკოს სამი მოთხოვნა უნდა შეესრულებინა: თანამდებობიდან უნდა გადამდგარიყო, ქუჩებში დემონსტრანტებზე ძალადობა სრულად უნდა შემწყდარიყო და
ყველა პოლიტიკური ნიშნით დაკავებული უნდა გათავისუფლებულიყო, რაც არ შესრულდა.

საპროტესტო აქციების პარალელურად ალექსანდრე ლუკაშენკოს ხელისუფლების მხრიდან რეპრესიები კვლავ გრძელდება. აქციებზე აკავებენ ათეულობით ადამიანს, ოპოზიციის წევრებს კი დაკითხვებზე იბარებენ.

9 აგვისტოს ჩატარებულ საპრეზიდენტო არჩევნების შედეგებს მოსახლეობა არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.