საქართველოს ბიზნეს ასოციაციის პრეზიდენტის, სოსო ფხაკაძის განცხადებით, პრემიერმინისტრთან შეხვედრაზე საშემოსავლო გადასახადებზე შეღავათების დაწესების საკითხი განიხილეს. მისი თქმით, სამუშაო ადგილების შენარჩუნების მიზნით, 2 მოთხოვნა წამოაყენეს.

ისინი ითხოვენ, რომ ტურისტული ინდუსტრიის წარმომადგენლებს, რომელთაც საშემოსასვლო გადასახადები 4 თვით ჰქონდათ გადავადებული, დაგროვილი გადასახადები ჩამოეწეროთ.

"ამ წლის 22 მაისს საგადასახადო კოდექსში შეტანილი იქნა ცვლილება, რომელიც ორ სექტორს შეეხო. ერთი ეხებოდა სასტუმროებს, რესტორნებს, კაფეებს, ტურისტულ კომპანიებსა და ტუროპერატორებს. ამ ინდუსტრიას პირველი დეკემბრისთვის უდგება იმ საშემოსავლო გადასახადის გადახდა, რომლის გადავადებაც განხორციელდა 4 თვის ვადით. რეალური ვითარება ასეთია, რომ ამ ინდუსტრიას წელს არ უმუშავია თუ აგვისტოს თვეს არ ჩავთვლით და მომავალ რამდენიმე თვეში არ არის კარგი პროგნოზი ამ კუთხით. ვითხოვთ, რომ ეს დაგროვილი გადასახადი ჩამოეწეროს ამ ინდუსტრიას", — განაცხადა ფხაკაძემ.

მეორე მოთხოვნაც სამუშაო ადგილების შენარჩუნებას უკავშირდება და კონკრეტულად ბიზნესსექტორს ეხება. კერძოდ, მათ მოითხოვეს, რომ ბიზნეს კომპანიებს, რომლებიც პანდემიის პირობებში საშემოსავლო გადასახადებს არ იხდიდნენ, ეს შეღავათები, მინიმუმ, 6 თვის ვადით გაუხანგრძლივდეთ.

"22 მაისის გადაწყვეტილებით, საგადასახადო კოდექსში, ასევე, შევიდა ცვლილება და საშემოსავლო გადასახადს არ იხდიდა, ზოგადად, ბიზნესი, ნებისმიერი კომპანია, იმ შემთხვევაში თუ ხელფასი იყო 1 500 ლარამდე. ეს იყო ძალიან მნიშვნელოვანი და აქაც ჩვენ ფოკუსირებული ვართ იმ ადამიანებზე, რომელთაც შედარებით დაბალი ხელფასი აქვთ. ამ შეღავათის ვადა იწურება თვის ბოლოს და ჩვენი თხოვნაა, რომ მინიმუმ 6 თვის ვადით, ისე რომ ერთი ფისკალური წელი მოიცვას, მოგვეცეს საშუალება, რომ ეს გადასახადი არ გადავიხადოთ", — აღნიშნა მან.

მისი განცხადებით, კონკრეტული დაპირებები ჯერ არ გაცემულა, თუმცა მათ "მოლაპარაკებების ფანჯარა" უკვე გახსნეს. ფხაკაძის ვარაუდით, რამდენიმე კვირაში ამ საკითხებთან დაკავშირებით ისინი შეჯერდებიან.