ევროპული საქართველოს წევრებმა, გიგა ბოკერიამ, სერგი კაპანაძემ, ზურაბ ჭიაბერაშვილმა და ვახტანგ კალოიანმა 112-ის შენობის წინ ბრიფინგი გამართეს და ის კონკრეტული გეგმა წარადგინეს, რაც ქვეყანას მძიმე ეპიდსიტუაციის მართვაში დაეხმარება.

გიგა ბოკერიას თქმით, ევროპულმა საქართველომ შექმნა სამუშაო ჯგუფი, რომელსაც ზურაბ ჭიაბერაშვილი და ვახტანგ კალოიანი უხელმძღვანელებენ.

ბოკერიას თქმით, ხელისუფლება, იმის ნაცლად, რომ მომზადებულიყო მეორე ტალღისთვის, თავის ქებითა და თვითკმაყოფილებით იყო დაკავებული.

"ევროპული საქართველო კოვიდპანდემიის დაწყების მომენტიდანვე ძალიან მწვავე დისკუსიასა და პოლიტიკურ დაპირისპირებაში იყო ივანიშვილის გუნდთან იმ ნაბიჯებთან დაკაშირებით, რაც უნდა გადაედგა და არ უნდა გადაედგა მთავრობას ასეთი გამოწვევის დროს. ჩვენ ვთვლით, რომ მათი მხრიდან გადასახადების არდაწევა და საშუალო კლასისა და გაჭირვებულების არდახმარება არის დანაშაულის ტოლფასი და ამას აგრძელებენ დღესაც და ჩვენ მოწოდებებს ყურად არ იღებენ გადასახადების დაწევასთან დაკავშირებით", — განაცხადა გიგა ბოკერიამ.

ბოკერიას განცხადებით, მთავრობამ დისპროპორციულად, დრაკონულად დაკეტეს ქვეყანა და ზიანი მიაყენეს ქვეყანასა და მოქალაქეებს. მისი თქმით, კომენდანტის საათი; ცოლ-ქმრისთვის გვერდი-გვერდ ჯდომა მანქანში იყო აბსურდული, ასევე, ქუჩების მორეცხვა და ონლაინ ვაჭრობის შეზღუდვა.

"ჩაკეტვის ეს თვეები, რომლებიც ეპიდემიოლოგიურად იყო უსაფრთხო, უნდა გამოყენებულიყო ქვეყნის მომზადებისათვის, იმ მომენტისთვის, როცა გაიხსნებოდა ეკონომიკა და ისევ იქნებოდა მატება დაინფიცირებული ადამიანების. ახლა ჩვენ ვხედავთ ძალიან მძიმე სურათს, რომ არაფერი ივანიშვილის გუნდს ამ თვეების განმავლობაში არ გაუკეთებია, იმისთვის, რომ მომზადებულიყო ამ მდგომარეობისთვის. ეხლა საუბრობენ კოვიდ საწოლებსა და საველე ჰოსპიტლებზე, ეხლა აღმოაჩინეს, რომ ცხელი ხაზი, შესაძლოა, გადაიტვირთოს და ეხლა იწყებენ ამ ყველაფერზე საუბარს", — აღნიშნა გიგა ბოკერიამ.

ბოკერიამ განაცხადა, რომ მთელი ეს თვეები მთავრობამ საკუთარი თავის ქებისთვის, თვითტკბობისთვის და დამუნათებისთვის გამოიყენა. ბოკერიას თქმით, მთავრობა ამუნათებდა ჟურნალისტებსაც და ყველას, ვინც კითხვებს სვამდა, რაც ნორმალურია დემოკრატიულ საზოგადოებაში. მისივე თქმით, ეს არის კიდევ ერთი ტრაგიკული მაგალითი, როგორ არ უნდა იქცეოდეს მთავრობა ასეთი კრიზისის დროს.