საქართველოს ახალგაზრდა იურისტთა ასოციაცია გელათის სამონასტრო კომპლექსის დაზიანებაზე სამართლებრივ შეფასებას ითხოვს. საიამ ამისთვის დღეს საქართველოს პროკურატურას განცხადებით მიმართა და მსოფლიო კულტურული მემკვიდრეობის ნუსხაში მყოფი გელათის სამონასტრო კომპლექსის დაზიანებაზე გამოძიების დაწყება მოითხოვა.

ირაკლი შოთაძის უწყების სახელზე წარდგენილ განცხადებაში, საია გამოძიების დაწყებას საქართველოს სისხლის სამართლის კოდექსის ორი მუხლით ითხოვს. საუბარია სსკ-ის 2592 მუხლსა (კულტურული მემკვიდრეობის დაზიანება ან განადგურება) და ამავე კოდექსის 342-ე მუხლზე (სამსახურებრივი გულგრილობა).

"მიუხედავად იმისა, რომ საველე დათვალიერების ანგარიშის სათაურში, თავად კულტურული მემკვიდრეობის დაცვის სააგენტო, სიტყვა — "ხარვეზებს" იყენებს, ანგარიშის შინაარსის და შემდგომში გავრცელებული სხვა თანმდევი ინფორმაციის გათვალისწინებით, ნათელია, რომ საქმე გვაქვს არა ხარვეზებთან, არამედ ძეგლის დაზიანებასთან, რაც საქართველოს სისხლის სამართლის კოდექსის თანახმად დასჯადია", — აცხადებენ საიაში.

კულტურული მემკვიდრეობის დაცვის სააგენტოში 19 ოქტომბერს განაცხადეს, რომ გელათის დროებითი გადახურვის პროექტი სამონასტრო კომპლექსის წინაშე არსებულ გამოწვევებს სრულად პასუხობს და ტაძარში წყლის ჩადინების არიდებას მაქსიმალურად უზრუნველყოფს. მათივე თქმით, ტაძარზე სარესტავრაციო პროცესის ფარგლებში დროებითი გადახურვის მოწყობა ბოლო დღეების განმავლობაში დაჩქარებული ტემპით მიმდინარეობს.

"ღვითსმშობლის სახელობის ტაძარზე (ეკვდერებზე, კარიბჭეებზე, საკურთხეველზე, პასტოფორიუმებზე, ნართექსსა და მკლავებზე) დროებითი სახურავის მოწყობა მიმდინარე წლის დეკემბრის თვემდე ეტაპობრივად დასრულდება", — აცხადებენ კულტურულ მემკვიდრეობაში.

გელათის ღვთისმშობლის სახელობის ტაძრის გადახურვა, კერძოდ კი თეთრი კერამიკით დამზადებული მოჭიქული კრამიტი, 2020 წლის ზამთარში მცირე ყინვის შემდეგ დაზიანდა.

საქართველოს კულტურული მემკვიდრეობის დაცვის ეროვნულ სააგენტოში მაშინ აცხადებდნენ, რომ გარდა ამისა, მიმდინარე წლის თებერვალში ტაძრის დასავლეთ მკლავში წყალი ჩადიოდა და კედლის მხატვრობა ზიანდებოდა.

საიაში განმარტავენ, რომ სააგენტოს მიერ 2020 წლის 11 მარტს განხორციელებული საველე დათვალიერების ანგარიშში მითითებულია, რომ დათვალიერების დროისათვის — კედლის მხატვრობის ფენები სველი იყო. კედლის მხატვრობის აღნიშნული დაზიანების მიზეზად, წყლის/ტენის სტრატიგრაფიაში აკუმულირება არის მითითებული. წყლის სავარაუდო წყაროდ კი გაუმართავი სახურავი დასახელდა.