ევროპული საქართველოს საარჩევნო შტაბის ხელმძღავენლმა, სერგი კაპანაძემ განაცხადა, რომ გუშინ გარდაბნის რაიონის სოფელ ყალაჯარალში, პარტიის მხარდამჭერს თავს დაესხნენ. მისი თქმით, თავდამსხმელები ქართული ოცნების აქტივისტები იყვნენ, ხოლო მას შემდეგ, რაც ევროპული საქართველოს აქტივისტმა ეს პოლიციაში განაცხადა, მის ოჯახზე ზეწოლა და დაშინება მოხდა.

„ჩვენს აქტივისტს, თავს დაესხნენ, ცემეს ის. შემდეგ ის წავიდა პოლიციაში, თქვა, რომ ეს გააკეთა ქართული ოცნების აქტივისტებმა და როგორც ხდება ხოლმე, ტრადიციულად, მის ოჯახზე მუქარის შედეგად, ათქმევინეს, რომ ის არის არა ევროპული საქართველოს, არამედ ქართული ოცნების მხარდაჭერი. ეს ჩვეულებრივი, კლასიკური ქართული ოცნების სტილია. ჯერ ძალადობა, შემდეგ ზეწოლა იმ იმედით, რომ ამოჩნდება, ეს ადამიანები აღარ უჭერენ მხარს იმ პარტიას, ვისთან აფილირების გამოც მასზე იძალადეს", — განაცხადა კაპანაძემ.

კაპანაძის თქმით, ხელისუფლების მხრიდან საარჩევნო პროცესში მსგავსი ძალადობრივი ფაქტები მოსალოდნელია, თუმცა მისი განმარტებით, ეს ქართულ ოცნებას ხელისუფლების შენარჩუნებაში "ვერ უშველის".

"მათ, რაც არ უნდა იძალადონ ევროპული საქართველოს აქტივისტებსა და მომხრეებზე, თუ სხვა პოლიტიკური პარტიის მომხრეებზე, საბოლოო ჯამში, ეს მათ არ მოუტანს შედეგს, რომ შეინარჩუნონ ხელისუფლება და შემდეგში, წაგების მერე, ბუნებრივია, ამ ყველაფრის გამო მათ ექნებათ სერიოზული პრობლემები", — აღნიშნა მან.

შინაგან საქმეთა სამინისტროში On.ge-ს უთხრეს, რომ აღნიშნულზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

On.ge ქართულ ოცნებასაც დაუკავშირდა, თუმცა პარტიაში ჩვენს ზარებს არ პასუხობენ.