ფოტო: Reuters/Umit Bektas

თურქმა პროკურორებმა 5 იანვარს გასცეს იმ სამხედროების ცოლების დაპატიმრების ბრძანება, რომლებსაც ბრალად ედებათ 2016 წლის 15 ივლისს გადატრიალების მცდელობაში. სამხედროების ცოლებს, ქმრების მსგავსად, ბრალდებათ გადატრიალების მცდელობაში მონაწილეობა და ფეტულა გიულენის მოძრაობის წევრობა. ინფორმაციას მომხდარის შესახებ თურქული გამოცემა, Hurriyet Daily News ავრცელებს.

თურქული გამოცემის ინფორმაციით, 5 იანვარს დაკავების ბრძანება გაიცა 105 ქალზე, რომელთაგან 15 არის პოდპოლკოვნიკის ცოლი, 40 - მაიორის, 40 - კაპიტნის, 4 კი - პირველი ლეიტენანტის. როგორც Hurriyet წერს, მათი დაკავების ბრძანება გაიცა იმ გამოძიების ფარგლებში, რომელიც უკავშირდება საჯარო მოხელეთა შერჩევის ტესტირებისას შესაძლო დარღვევების გამოვლენას.

დაკავებულ ქალებს ბრალად ედებათ ფეტულა გიულენის მოძრაობის დაფინანსება Bank Asya-ს საშუალებით, მოძრაობის ლიდერებთან კავშირი და ასევე, საჯარო მოხელეთა კონკურსის საგამოცდო კითხვების წინასწარ დაუფლება. ქალების დაპატიმრების სპეცოპერაცია თურქეთის 31 პროვინციაში ერთდროულად ჩატარდა.

2016 წლის 15 ივლისს, თურქეთში გადატრიალების მცდელობის შემდეგ, დააპატიმრეს 20 ათასზე მეტი პირი, მათ შორის არიან სამხედროები, სამართალდამცავები, პროკურორები, მასწავლებლები, მოსამართლეები, ჟურნალისტები და სხვა პროფესიის ადამიანები. რაც შეეხება სამსახურიდან გათავისუფლებულ იგივე პროფესიის ადამიანებს, მათი რაოდენობა 80 ათასს აღემატება.