აზერბაიჯანელი ჟურნალისტი, აფგან მუხთარლი ამბობს, რომ აპირებს Georgian Airways-სა და საქართველოს მთავრობას სასამართლოში უჩივლოს. მუხთარლი ბერლინიდან თბილისში დღეს, 9 ოქტომბერს უნდა ჩამოფრენილიყო, თუმცა გერმანიაში ბორტზე ასვლის უფლება არ მისცეს.

როგორც მუხთარლი On.ge-ს უყვება, თავდაპირველად მას უთხრეს, რომ დოკუმენტები არ ჰქონდა მოწესრიგებული, შემდეგ კი კორონავირუსთან დაკავშირებული ახალი წესები დაუსახელეს, თუმცა დასაბუთებული პასუხი მაინც ვერ მიიღო. საბოლოოდ, მას ბილეთი გაუნულეს.

მუხთარლის თქმით, რეგისტრაციაზე მისვლისას კომპანიის წარმომადგენელმა ჰკითხა ის ჟურნალისტი იყო თუ არა, რომელიც თბილისიდან გაიტაცეს.

"პასპორტი მივეცი, ID ბარათი მივეცი გერმანული. მან საქართველოს საელჩოში დარეკა, შემდეგ საკონსულოში, ბოლო ნახევარი საათის განმავლობაში ვუმტკიცებდი, რომ ყველაფერი მაქვს, მათ შორის პროკურატურის მოსაწვევი. ბლანკი შევავსე საქართველოს საგარეო საქმეთა სამინისტროში და ოფიციალური პასუხი მომივიდა, რომ გავიარე რეგისტრია და შემიძლია საქართველოში ჩამოსვლა ერთი პირობით, რომ კორონავირუსზე PCR ტესტს გავივლიდი. ესეც გავაკეთე", — ყვება მუხთარლი.

აზერბაიჯანელი ჟურნალისტი ვარაუდობს, რომ თბილისში ჩამოსვლა საქართველოს მთავრობის გადაწყვეტილებით შეეზღუდა. ამასთან, იგი ამბობს, რომ გერმანიის რეზიდენტია.

"კომპანიასა [Georgian Airways] და მთავრობას უნდა ვუჩივლო. არავითარი განმარტება არ მომცეს. კომპანიამ არაფერი მითხრა. უბრალოდ მითხრა, რომ არ შეგიშვებთო. თუმცა განმარტება არავის უთქვამს, რადგან ასეთი განმარტება არ არსებობს. ბორტზე უკანონოდ არ ამიშვეს", — ამბობს ჟურნალისტი.

აფგან მუხთარლისთან დაკავშირებით განმარტებითი განცხადება გაავრცელა Georgian Airways-მა. მათი თქმით, საქართველოში მოქმედებს სპეციალური რეგულაცია, რომელიც იმპერატიულად ადგენს იმ ქვეყანათა ნუსხას, რომელთა მოქალაქეები და მუდმივი ცხოვრების უფლების მქონე პირები დაუბრკოლებლად შემოდიან საქართველოში.

"აზერბაიჯანი არ შედის ამ ე.წ. მწვანე ზონის ქვეყნების ჩამონათვალში. შესაბამისად, ავიაკომპანია აირზენა ვერ გაუწევდა მომსახურებას აზერბაიჯანის მოქალაქეს, აფგან მუხთარლის, რომელიც არც სხვა რომელიმე მწვანე ზონის სტატუსის მქონე ქვეყნის მოქალაქეა და არც მუდმივი ცხოვრების უფლებით სარგებლობს, რის გამოც ჩვენი კომპანია მოკლებული იყო შესაძლებლობას მომსახურებოდა მას", — ნათქვამია განცხადებაში.

2017 წლის 29 მაისს თბილისიდან გაუჩინარებული ჟურნალისტი მეორე დღეს ბაქოს ციხეში აღმოჩნდა. იგი ამბობს, რომ საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხთარლი საზღვრის უკანონო კვეთის გამო დააკავეს.

მუხთარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხთარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო. საქმეზე გამოძიება საქართველოში ამ დრომდე მიმდინარეობს.

მუხთარლის აზერბაიჯანში 6-წლიანი პატიმრობა მიუსაჯეს. საერთაშორისო ადამიანის უფლებადამცველმა ორგანიზაციებმა იგი პოლიტიკურ პატიმრად აღიარეს.