მარნეულის მუნიციპალიტეტში დაპირისპირება მოხდა, რომელშიც ერთიანი ნაციონალური მოძრაობის, ქართული ოცნებისა და ცესკოს წარმომადგენლები ფიგურირებდნენ.

აღნიშნულის შესახებ ერთიანი ნაციონალური მოძრაობის ვერსია ცესკოსა და ქართული ოცნების მიერ გავრცელებული ვერსიებისგან განსხვავებულია — ქართული ოქნება პროვოკაციასა და ძალადობაში ენმ-ს ადანაშაულებს, ოპოზიციაში კი ამას უარყოფენ და უსამართლო მიდგომაზე საუბრობენ.

ქართული ოცნების ერთ-ერთი ლიდერის, მამუკა მდინარაძის განცხადებით, ნაციონალური მოძრაობის წარმომადგენლები ცესკოს საოლქო კომისიის შენობასთან მივიდნენ, რომლის მიმდებარე ტერიტორიაზეც არის ქართული ოცნების შტაბი და შეურაცხყოფის ფონზე აპირებდნენ შტაბის წევრების პროვოკაციაზე წამოგებას.

მდინარაძის თქმით, ამის შემდეგ აქტივისტი და ცენტრალური საარჩევნო კომისიის წევრი ნაციონალური მოძრაობიდან ცესკოს საოლქო ორგანიზაციის შენობაში შეუშვეს. მისი ინფორმაციით, კომისიის წევრმა ფიზიკური შეურაცხყოფა მიაყენა და მაისური შემოახია ცესკოს თანამშრომელს, რასაც ფიზიკური დაპირისპირება მოჰყვა.

ცესკომ აღნიშნულის შესახებ განაცხადა, რომ საოლქო საარჩევნო კომისიაში მყოფი პირები უნებართვოდ იღებდნენ ვიდეოს. მათი ცნობით, ცესკოს თანამშრომელმა გადაღების მიზეზი იკითხა, რაზეც პასუხად ფიზიკური ძალადობა მიიღო.

On.ge დაუკავშირდა ერთიანი ნაციონალური მოძრაობის შტაბის ხელმძღვანელს მარნეულში, აგილ მუსტაფაევს, რომელმაც აღნიშნული უარყო და პროვოკაციის მოწყობაში ქართული ოცნება დაადანაშაულა. მუსტაფაევის განმარტებით, ისინი არა პროვოკაციის, არამედ მშვიდობიანი აქციის გასამართად მივიდნენ და აპროტესტებდნენ იმ ფაქტს, რომ მათი წარმომადგენელი საოლქო საარჩევნო კომისიის სხდომაზე არ მიიწვიეს. ცესკოში კი აცხადებენ, რომ ბრალდებები არის უსაფუძვლო და სიცრუის ტირაჟირება.

ბოლო პერიოდში პარტიები ხშირად ადანაშაულებენ ოპონენტებს თავდასხმასა და პროვოკაციის მოწყობაში. როგორც ერთიანი ნაციონალური მოძრაობისა და ევროპული საქართველოს წარმომადგენლები აცხადებენ, მმართველი გუნდის მხრიდან მათზე ზეწოლა ხორციელდება, რასაც ქართულ ოცნებაში უარყოფენ.

აღნიშნულის შესახებ სახალხო დამცველმა განაცხადა, რომ წინასაარჩევნო პერიოდში მომხდარი ძალადობის ფაქტები ქვეყანაში დაუსჯელი რჩება, რაზეც შინაგან საქმეთა სამინისტროში განაცხადეს, რომ საარჩევნო დარღვევების დროს მტკიცებულებების საფუძველზე, ყოველთვის დგებოდა კონკრეტული პირების პასუხისმგებლობის საკითხი, მათ შორის წინა არჩევნებზეც.