ევროპული საქართველოს ზუგდიდის მაჟორიტარობის კანდიდატი, გიგი უგულავა, პარტიის წევრებთან ერთად, სოხუმის დაცემიდან 27 წლის თავზე, ენგურის ხიდთან მივიდა. ევროპული საქართველოს წევრებს ხელში ბანერი, წარწერით "რუსეთი ოკუპანტია" ეჭირათ.

გიგი უგულავას თქმით, სოხუმის დაცემის დღე არის უდიდესი ტკივილი მთელი საქართველოსთვის. უგულავას თქმით, აუცილებლად დადგება დრო როცა აფხაზებისთვის და ოსებისთვის პრაგმატულად უსარგებლო იქნება რუსეთის კოლონიად ყოფნა და სწორედ ამ დროს უნდა ვიყოთ მზად. უგულავამ აღნიშნა, რომ ამიტომაა გარდამტეხი ცვლილებები დღეს მნიშვნელოვანი.

"დღეს სოხუმის დაცემის დღე არის, ეს არის უდიდესი ტკივილი მთელი საქართველოსთვის, ამავე დროს შეხსენება იმის, რომ სანამ საქართველო არ იქნება საერთაშორისოდ აღიარებულ მიწა-წყალზე ერთიანი, ეს ტკივილი არ გაქარწყლდება.

უნდა გვახსოვდეს, რომ ეს ტკივილი იქით მხარესაც არის და ჩვენ წლიდან წლამდე ვშორდებით ერთმანეთს, ვშორდებით ცხოვრების წესებს, ვშორდებით ადამიანურად და შეუძლებელია, რომ ეს ცივი ომის მდგომარეობა დიდხანს გაგრძელდეს. დადგება აუცილებლად დრო, როდესაც აფხაზები აუცილებლად გაიაზრებენ და მათთვის პრაგმატულად იქნება წამგებიანი რუსების კოლონიად ყოფნა და ამ დროს უნდა ვიყოთ მზად და ამიტომ არის მნიშვნელოვანი ის გარდამტეხი ცვლილებები, რომელიც წელს უნდა დაიწყოს, რადგან ჩვენ უნდა ვიყოთ მზად ჩვენ პარტნიორებთან ერთად, გამთლიანებისათის, ეს შესაძლებლობების ფანჯარა აუცილებლად გაჩნდება ძალიან მალე, უფრო ადრე, ვიდრე ჩვენ გვგონია და მთავარი ამ დროს იქნება ის, თუ როგორი მომზადებული ვიქნებით ჩვენ. სწორედ ეს იქნება დაღვრილი სისხლის და უდიდესი ტკივილის ანაზღაურება და გამოსწორება. დღეს საქართთველო უნდა იყოს მზად, რომ გაერთიანდეს", — განაცხადა გიგი უგულავამ.