ევროკავშირის ელჩი საქართველოში, კარლ ჰარცელი აცხადებს, რომ მედია პოლარიზაცია, გენდერული სტერეოტიპები და სიძულვილის ენა კვლავ პრობლემას უქმნის მედიის ხარისხის გაუმჯობესებას. ამის შესახებ მან საპარლამენტო არჩევნების მედიამონიტორინგის შუალედური ანგარიშის ონლაინ პრეზენტაციაზე განაცხადა.

ჰარცელი საუბრობს ძირითად მიგნებებზე, როგორებიცაა მედია პოლარიზაციის პრობლემა, რომელიც თან ახლავს პოლიტიკურ პოლარიზაციას. მან აღნიშნა წინა კამპანიის დროს მედიის როლიც, რომელმაც უფრო მეტად შექმნა პოლიტიკური დისკურსი, ვიდრე მოახდინა ფაქტებზე რეაგირება. ის ასევე გამოყოფს გენდერული სტერეოტიპებს, სქესობრივი დისკრიმინაციას და სიძულვილის ენას 2018 წლის საპრეზიდენტო არჩევნების დროს.

"არსებობს მედიის სხვადასხვა სექტორში სხვადასხვა ტიპის მიგნება. მე ვთვლი, რომ ნამდვილად მისასალმებელია, როცა მედია პოლიტიკური პარტიებისა და აქტორების ფართო სპექტრს აშუქებს, თუმცა, ამავდროულად, ჩვენ ვხედავთ მედია პოლარიზების ფენომენს პოლიტიკური პარტიების პოლარიზაციის მხარდამხარ. ასევე, ჩვენ უნდა აღვნიშნოთ, რომ წინა კამპანიის დროს, ბევრმა მედია საშუალებამ ნაკლებად მიაწოდა მაყურებელს სიღრმისეული ანალიზი და ხელი შეუწყო პოლიტიკური დისკურსის გაღვივებას უფრო მეტად, ვიდრე ფაქტებზე რეაგირებას. ასევე აღვნიშნავ, რომ სტერეოტიპები და სქესობრივი დისკრიმინაცია ამ დიდი სურათის ნაწილად რჩება", — აცხადებს ჰარცელი.

წინასაარჩევნო მედიამონიტორინგის ანგარიში დღეს გამოქვეყნდა. მონიტორები დააკვირდნენ როგოც ტელევიზიებს, ისე რადიოებს, ინტერნეტ და ბეჭდურ მედიას, ასევე სოციალურ ქსელებს.