ევროპული საქართველოს ბათუმის მაჟორიტარობის კანდიდატის, არმაზ ახვლედიანის თქმით, ის მდგომარეობა რომელიც ქვეყანაშია - გაუცხოება, კორუფცია, ბიუროკრატების ერთადერთი სურვილი გაისქელონ ჯიბეები, უნდა დასრულდეს და ამას სჭირდება რადიკალური, ფუნდამენტალური, გარდამტეხი ცვლილებები.

ახვლედიანმა აღნიშნა, რომ ამ ბრძოლაში ის ევროპულ საქართველოს სწორედ იმ მიზეზით შეუერთდა, რომ ევროპულმა საქართველომ ყველაზე უკეთ გაიაზრა წარსულის დრამატული შეცდომები და იცის, რა არის სამართლიანობა და ჰუმანურობაზე ორიენტირებული მმართველობა.

"საქართველში წლებია ისეთი ვითარება გვაქვს, რომ ამ ხანძარს ლოკალურად კი ვერ ჩააქრობ, კი ვერ უშველი შეგონებებით და თეორიებით, არამედ უნდა ჩაერთო ამ ბრძოლაში. ბრძოლაში, რომელიც შედეგად მოიტანს იმას, რომ ივანიშვილიზმი არა უბრალოდ ახლა ამოიძირკვება ქართული პოლიტიკური რეალობიდან, არამედ აღარ განმეორდება, როგორც არ განმეორდება ოცნებამდელი წლების დრამატული სისტემური დანაშაულებები.

ჩემი დაკვირვებით, ერთადერთი გზა იმისათვის, რომ საქართველო გახდეს ნორმალური ქვეყანა, ყველა ხვდებოდეს, რომ ხელისუფლება მისგან გაუცხოებული კი აღარ იქნება, ხელისუფლება მარტო იმით კი არ იქნება დაკავებული, რომ კორუფციის ჭაობში ამყოფოს ქვეყანა და გაიმდიდროს, გაისქელოს ჯიბეები, დაამახინჯოს ბათუმი და ყველადერი იკადროს იმისათის, რომ თავად იყოს კარგად, კომფორტულად, ხალხი კი ამყოფოს მონობაში ... ეს რომ დასრულდეს, ამიტომ საჭიროა რადიკალური, ფუნდამენტალური ცვლილებები.

დღეს, ქართულ პოლიტიკურ პროდასავლურ ოპოზიციურ ფლანგზე, თითზე ჩამოსათვლელია ის პოლიტიკოსი ან პოლიტიკური ძალა, რომელსაც შეუძლია ამ მხრივ რეალური გარდაქმნების ლოკომოტივის როლი შეასრულოს. ევროპულმა საქართველომ მოახერხა ის, რომ ყველაზე უკეთ გაითავისა წარსულის შეცდომები, მათ შორის დრამატული შეცდომებიც. ეს არის გუნდი, ვისაც ყველაზე კარგად ესმის რას ნიშნავს კოალიციური მმართველობა და ყველაზე კარგად იცის, რომ დანაშუალებრივი შეცდომები შეიძლება გამოსწორდეს მხოლოდ იმ შემთხვევაში, თუ ჩვენ შემოვიტანთ ქართულ პოლიტიკურ სივრცეში მთავარს, სამართლიან წესრიგს, დემოკრატიას, ადამიანის უფლებებზე, ჰუმანურობაზე ორიენტირებულ მმართველობას. ეს შესაძლებელია არა სიტყვებით, თუნდაც ისეთით, როგორიც ახლა მე მოგმართეთ, არამედ მოქმედებით, უანგარო, თავგანწირული, პატიოსანი და პროფესიონალური ძალისხმევით ადამიანებისა, ვისაც შესწევს იმის უნარი, რომ თქვას და გააკეთოს." — განაცხადა არმაზ ახვლედიანმა.