ჩეჩნეთში იპოვეს იშვიათი ქვა, რომელსაც შუა საუკუნეების ასომთავრული წარწერები აქვს. ინფორმაცია ამის შესახებ ჩეჩნეთის მეცნიერებათა აკადემიის ჰუმანიტარული კვლევების ინსტიტუტის თანამშრომელმა, აზამატ ახმაროვმა ფეისბუქზე გაავრცელა.

"იტუმ-კალინსკის რაიონში, ბაუოლოის დასახლებაში მეჩეთის ნანგრევების დათვალიერებისას ნაპოვნია იშვიათი ძეგლი შუასაუკუნოვანი დამწერლობით. ესაა ქვის ბლოკი 24 ასოთი, რომელიც ასომთავრულით არის დაწერილი. არტეფაქტი გროზნის არქეოლოგიური კვლევების ცენტრშია გადატანილი. ქართველ კოლეგებთან ერთად ტექსტის გაშიფვრაზე მუშაობა დაწყებულია", — დაწერა ახმაროვმა.

მეცნიერის თქმით, აღნიშნული ძეგლი უნიკალურია მთიანი ჩეჩნეთის ისტორიულ-გეოგრაფიული ნაწილისთვის, მათ შორის მდინარე არღუნის ხეობისთვის, რომელიც საწყისს საქართველოში იღებს.

"უნიკალურობა გამოიხატება იმაში, რომ ამ შემთხვევაში საქმე გვაქვს მთელ ტექსტთან. აქამდე ჩეჩნეთში ნაპოვნი სხვა ძეგლები რამდენიმე სიმბოლოსგან შემდგარ ფრაზებს მოიცავდა", — განმარტა ახმაროვმა.

ეხო კავკაზას ინფორმაციით, ბაუოლოის დასახლება, სადაც 30-მდე ადამიანი ცხოვრობს, მდინარე არღუნის ერთ-ერთ შესართავთან, მთებში მდებარეობს. ბაუოლოის მეჩეთი, სავარაუდოდ, ადრინდელი ქრისტიანული ტაძრის ადგილზე გაჩნდა.