ნაციონალურმა მოძრაობამ, შესაძლოა, გიორგი ვაშაძეს ისნის ოლქში კონკურენტი კანდიდატი დაუყენოს. ამის შესახებ პარტიის წევრებმა დღეს პოლიტსაბჭოს შეხვედრის შემდეგ განაცხადეს.

ენმ-ის ლიდერის, ხატია დეკანოიძის განცხადებით, ისნის რაიონში კანდიდატის დაყენების სურვილი მათ ამომრჩევლებს აქვთ და ამაზე იმსჯელეს, თუმცა გადაწყვეტილება ჯერ არ მიუღიათ. ფორმულას კითხვაზე, შესაძლოა თუ არა, თავად იყოს ვაშაძის კანდიდატი, დეკანოიძე პასუხობს:

"არავითარი გადაწყვეტილება არ ყოფილა, არც ზოგადი, არც გენერალური მაჟორიტარებზე. ჩვენი მთავარი კონკურენტი, ნაციონალური მოძრაობის, არის ქართული ოცნება, მათი ყველა კანდიდატი და ბიძინა ივანიშვილი".

თინა ბოკუჩავას განცახდებით, ვაშაძის გადადგმული ნაბიჯები მოულოდნელი იყო. კითხვაზე, შესაძლოა, თუ არა მას კანდიდატი დაუყენონ, ის პასუხობს:

"ვნახოთ, კიდევ ერთხელ ვიმეორებ, ახლა მიმდინარეობს კონსულტაციები პარტიაში".

27 ივლისს, გიორგი ვაშაძემ და თაკო ჩარკვიანმა პოლიტიკურ პარტიათა კოალიცია, ძალა ერთობაშია დატოვეს და ახალი პოლიტიკური პლატფორმა, სტრატეგია აღმაშენებელი წარადგინეს. მათი განცხადებით, სტრატეგია აღმაშენებელი ამ ეტაპზე კიდევ ორ სუბიექტს — ახალი საქართველო და კანონი და სამართალს აერთიანებს.

კოალიციიდან წასვლის შემდეგ ვაშაძე ენმ-ს წევრებმა გააკრიტიკეს. მათ შორის, პარტიის ლიდერმა, მიხეილ სააკაშვილმა მისი წასვლა "ბნელ მხარეზე" გადასვლად შეაფასა. პასუხად ვაშაძემ ვარსკვლავური ომების პერსონაჟის ტანზე თავი მიიფოტოშოფა და დაპოსტა, რომ ბნელ ძალას დაამარცხებდა.

რაც შეეხება მაჟორიტარ კანდიდატებს, გიორგი ვაშაძე ოპოზიციის გაერთიანების საერთო კანდიდატებს შორის იყო დასახელებული იქამდე, სანამ ძალა ერთობაშიას დატოვებდა.