ინფექციური საავადმყოფოს სამედიცინო დირექტორის, მარინა ეზუგბაიას თქმით, კარანტინისთვის 12 დღე საკმარისი დროა. ის ასე გამოეხმაურა მთავრობის ახალ დადგენილებას, რომლის მიხედვით ადამიანი კარანტინში არა 14, არამედ 12 დღის განმავლობაში განთავსდება.

ეზუგბაიას განცხადებით, ინკუბაციის პერიოდად, ზოგადად, 12 დღე განიხილება.

"ზოგადად, ინკუბაციის პერიოდი არის საშუალოდ 12 დღე. უბრალოდ, ჩვენ 14 დღე აღებული გვქონდა ყოველგვარი გადაფარვის თვალსაზრისით. ეს 12 დღე არ არის მოგონილი, ეს არის რეალურად. 12 დღე საკმარისია იმისთვის, რომ მე-12 დღეს რომ გაკეთდება ადამიანთან კვლევა, იმასთან თუ უარყოფითია პასუხი, ის, რა თქმა უნდა, კიდევ 24/48 საათი განიხილება როგორც ჯანმრთელი და აქედან გამომდინარე 14 დღეს მოიცავს. ასე, რომ პრობლემა ამაში არ არის. გარკვეულწილად, შეუმსუბუქდებათ კონტაქტირებულებსა და დაავადებულებს საკარანტინო პერიოდი", — აცხადებს ეზუგბაია.

მთავრობის ახალი დადგენილების მიხედვით, იზოლაციისა და კარანტინის წესებში ცვლილებები შედის. ახალი გადაწყვეტილებით, ადამიანი კარანტინში არა 14, არამედ 12 დღის განმავლობაში განთავსდება. ცვლილება უცხო ქვეყნიდან და საქართველოს ოკუპირებული ტერიტორიებიდან გადმოსულ პირებს, ასევე კორონავირუსის შემთხვევასთან კონტაქტირებული ყველა ფიზიკურ პირს ეხება.