ერთიანი ნაციონალური მოძრაობის წევრის, სალომე სამადაშვილის თქმით, დავით ბაქრაძის მხრიდან მიხეილ სააკაშვილზე "თავდასხმა" ევროპული საქართველოს მაჟორიტარ კანდიდატებს ძვირი დაუჯდებათ. ასე გამოეხმაურა იგი ბაქრაძის განცხადებას, რომ სააკაშვილი, ადეიშვილი და მერაბიშვილი კოალიციურ მთავრობაში არ იქნებიან.

"მსგავსი განცხადებები ნამდვილად არ ეხმარება ამ ერთიანობას, იმიტომ, რომ, მაგალითად, ჩემთვის გაუგებარია, რატომ არ იფიქრა ბატონმა ბაქრაძემ, რომ მისი მხრიდან თავდასხმა მიხეილ სააკაშვილზე ძალიან ძვირი დაუჯდებათ, მაგალითად, მაჟორიტარ კანდიდატებს ევროპული საქართველოდან, სადაც მათ სჭირდებათ ერთიანი ნაციონალური მოძრაობის ამომრჩევლის მხარდაჭერა", — აცხადებს სამადაშვილი.

მისი თქმით, გაუგებარია, რატომ უნდა ენდოს ბაქრაძეს ამომრჩეველი მსგავსი განცხადებების შემდეგ.

"ასევე, ვფიქრობ, რომ ცოტათი გაუგებარი იქნება ამომრჩევლისთვის მსგავსი განცხადებები ადამიანისგან, რომელსაც საკონსტიტუციო უფლებამოსილება და ვალდებულებაც ჰქონდა აღმასრულებელი ხელისუფლების კონტროლის, როდესაც იგი პარლამენტის თავმჯდომარე იყო. გაუგებარია, მაშინ რატომ უნდა ენდოს ბაქრაძეს ამომრჩეველი დღეს, როცა იგი თავის დროზე ვერ ასრულებდა იმ ფუნქციებს, რომელიც ეკისრებოდა", — აღნიშნა სალომე სამადაშვილმა.

ევროპული საქართველოს ერთ-ერთმა ლიდერმა, დავით ბაქრაძემ ღამის კურიერში თქვა, რომ კოალიციური მთავრობის შემთხვევაში, მიხეილ სააკაშვილი, ზურაბ ადეიშვილი და ვანო მერაბიშვილი მინისტრთა კაბინეტში არ იქნებიან, მათ შორის, არც პრემიერმინისტრად.