ჩინეთის ორ ქალაქში იმპორტირებულ, გაყინულ პროდუქტში Covid-19-ის კვალი იპოვეს. ინფორმაციას ამის შესახებ Reuters ავრცელებს. ადგილობრივი მაღალჩინოსნები აცხადებენ, რომ საკვების გადაზიდვამ შეიძლება ეპიდემიის გავრცელების ახალი კერები წარმოქმნას.

ერთი შემთხვევა ბრაზილიის სამხრეთში მდებარე ქალაქიდან იმპორტირებული გაყინული ქათმის ფრთებში აღმოჩნდა, მეორე კი გაყინული ეკვადორული კრევეტების გარეთა შეფუთვაზე.

ბრაზილიის ჯანდაცვის სამინისტროს მაღალჩინოსნები ტესტირებას უტარებენ ყველას, ვისაც შეიძლებოდა დაბინძურებულ საკვებ პროდუქტთან კავშირი ჰქონოდა, თუმცა ყველა ტესტი უარყოფითი იყო.

Reuters წერს, რომ მათ თხოვნას კომენტარის გაკეთებაზე პეკინში ბრაზილიის საელჩომ მყისიერად არ უპასუხა, ხოლო პეკინში ეკვადორის საელჩოსთან დაკავშირება ვერ მოხერხდა.

შენჟენის ეპიდემიის პრევენციისა და კონტროლის ცენტრში განაცხადეს, რომ მოსახლეობამ უნდა გაითვალისწინოს უსაფრთხოების ზომები, რათა შემცირდეს იმპორტირებული ხორცისა და ზღვის პროდუქტებისგან ინფიცირების რისკი.