ზოგიერთი ტრადიცია თავისი შავბნელი ისტორიით მეტისმეტად უცნაურია.

საუკუნეების წინ ევროპაში ბუბონური შავი ჭირი, იგივე შავი სიკვდილი გავრცელდა და კონტინენტის მოსახლეობის მესამედი გაანადგურა. პანდემია თავდაპირველად აზიაში მე-14 საუკუნეში გაჩნდა, შემდეგ კი სავაჭრო საქარავნო გზით ევროპაში გავრცელდა.

2020 წლის დასაწყისში ევროპა კიდევ ერთი პანდემიის მასობრივად გავრცელების არეალში მოექცა: კორონავირუსის პანდემიამ ადამიანების ჯანმრთელობასთან ერთად მსოფლიო ეკონომიკაც დააზარალა. მათ შორის განსაკუთრებით მძიმე შედეგები ჰქონდა იტალიას, რომელიც ბოლო კვირების განმავლობაში ნელ-ნელა უბრუნდება ცხოვრების ჩვეულ კალაპოტს.

რამდენიმეთვიანი მკაცრი კარანტინის შემდეგ იტალიის მოსახლეობა შედარებით შემსუბუქებულ პირობებში განაგრძობს ცხოვრებას, თუმცა მთელი რიგი შეზღუდვები კვლავ მოქმედებს ქვეყანაში, რის გამოც ადამიანებს ახალი რეალობით უწევთ ცხოვრება.

სწორედ ამის ფონზე კვლავ შეიძინა აქტუალობა "ღვინის ფანჯრებმა" (იტალიურად buchette del vino): კედელში დატანებული მცირე ზომის ფანჯრები, რომლებიც ღვინისა და სხვა პროდუქტების მაღაზიების კედლებშია ამოჭრილი, რათა უსაფრთხო ფიზიკური დისტანციით სასმლის მიწოდება მოხდეს.

მსგავსი ტიპის ფანჯრები პირველად იტალიაში მე-17 საუკუნეში გამოჩნდა და შავი ჭირის შემდეგ საუკუნეების განმავლობაში ფუნქციადაკარგული იყო... დღევანდლამდე.

"ორი თვის განმავლობაში ყველა სახლში იყო გამოკეტილი და მხოლოდ ახლა დაგვრთო ნება ხელისუფლებამ, რომ თანდათანობით ცხოვრების ჩვეულ წესს დავუბრუნდეთ. ამ პერიოდში კი ზოგიერთი დაწესებულების მეპატრონემ, რომელთა შენობებზეც "ღვინის ფანჯრები" კვლავ შემორჩენილია, გადაწყვიტა, საუკუნეების წინანდელი ტრადიცია განეახლებინა და ადამიანებისთვის ჭიქა ღვინო, ყავა თუ სხვა ნებისმიერი სასმელი მაქსიმალური დისტანციის დაცვით მიეწოდებინა", — ვკითხულობ ღვინის ფანჯრის ასოციაციის ვებსაიტზე.

"სურვილის შემთხვევაში საკმარისია უბრალოდ ფანჯრის ხის საკეტით დააკაკუნოთ და მაშინვე იტალიაში ყველაზე ცნობილი ღვინით სავსე ჭიქას ფანჯრიდან მოგართმევენ", — აღნიშნა მატეო ფაგლიამ, ასოციაციის პრეზიდენტმა ინტერვიუში.

მარტო ფლორენციაში ასეთი 150 ფანჯარაა, რომელიც დიდი დროის განმავლობაში უფუნქციობის გამო დალუქული იყო. ტოსკანას მთელ რეგიონში კი კიდევ უფრო ბევრ მსგავსი ისტორიული ფანჯარაა მიმოფანტული.

"ღვინის ფანჯრები ნელ-ნელა უსარგებლო გახდა და მათი ნაწილი, რომლებიც ხით იყო დამზადებული, 1966 წლის წყალდიდობის დროს დაიკარგა", — აცხადებს მატეო ფაგლია, რომლის ასოციაციის მიზანიც იტალიაში ყველა მსგავსი ფანჯრის აღმოჩენა და შეძლებისდაგვარად მათი დაცვაა.

კორონავირუსის პანდემიის შედეგად იტალია ერთ-ერთი ყველაზე მეტად დაზარალებული ქვეყანაა: მსოფლიოს ჯანდაცვის ორგანიზაციის მონაცემებით, ინფექციის გავრცელების გამო 35 000-ზე მეტი იტალიის მოქალაქე დაიღუპა. ქვეყანა დღემდე ებრძვის პანდემიით გამოწვეულ მძიმე შედეგებს.