ცნობილი ბრიტანელი მწერალი ირვინ უელში და ამერიკელი ავტორი ბრეტ ისტონ ელისი ერთიანდებიან, რათა ახალი სერიალი გადაიღონ.

Variety-ის ცნობით, თანამედროვე მსოფლიო ლიტერატურის ამ ორ ცნობილ ავტორთან ბრიტანული კომპანია Burning Wheel Productions საბოლოო მოლაპარაკებებს აწარმოებს ახალ სატელევიზიო შოუსთან დაკავშირებით, რომლის სახელწოდებაც American Tabloid იქნება.

როგორც სახელწოდება მიგვანიშნებს, მომავალი პროექტში ბოლო ათწლეულების პოპულარულ ამერიკული ტაბლოიდების სარედაქციო პოლიტიკას ექნება განსაკუთრებული ყურადღება დათმობილი, სადაც პოლიტკორექტულობის, მორალისა და ეთიკის ნორმებს ხშირ შემთხვევაში არ უგულებელყოფენ.

ირვინ უელშს მთელ მსოფლიოში ყველაზე მეტად თავისი გახმაურებული რომანით Trainspotting (ჩხერკეთელაობა) იცნობენ, ბრეტ ისტონ ელისს კი ასევე ცნობილი პოსტმოდერნული რომანით ამერიკელი ფსიქოპათი. ორივე რომანი ბოლო წლებში ითარგმნა პირველად ქართულ ენაზე.

რამდენადაც ამ ორ წიგნს კარგად იცნობენ ლიტერატურულ სამყაროში, იმდენად პოპულარულია იმავე სახელწოდების მქონე მათი ეკრანიზაციებიც: ჩხერკეთელაობაში მთავარ როლს იუენ მაკგრეგორი ასრულებს, ამერიკულ ფსიქოპათში კი კრისტიან ბეილი.

Trainspotting

ფოტო: Miramax Films

American Psycho

ფოტო: Lionsgate

"მოხარულები ვართ, რომ ამ პროექტზე ისეთ უსაზღვროდ ნიჭიერ ხელოვანებთან ერთად ვიმუშავებთ, როგორებიც ბრეტი და ირვინი არიან. ეს მათი პირველი პროფესიონალური კოლაბორაცია იქნება და გვჯერა, რომ მათი შემოქმედებითი თავისუფლებით შთამბეჭდავ შედეგს უნდა ველოდოთ", — განაცხადა Burning Wheel Productions-ის წარმომადგენელმა.

როგორც ირვინ უელშს, ისე ბრეტ ისტონ ელისს შავი იუმორით, სოციალური უთანასწორობის კრიტიკითა და ბასრი ენით იცნობენ, შესაბამისად, მათი თანამშრომლობის შედეგად უახლოეს მომავალში დიდი ალბათობით რაღაც განსაკუთრებულად საინტერესო სატელევიზიო სანახაობას ვიხილავთ.