პარლამენტში კომიტეტის სხდომაზე, სადაც ელექტრონული კომუნიკაციების შესახებ კანონპროექტს განიხილავენ დეპუტატებს შორის სიტყვიერი დაპირისპირება იყო. ერთმანეთს ქართული ოცნების დეპუტატი, რომან კაკულია და დამოუკიდებელი დეპუტატი, ლევან კობერიძე დაუპირისპირდნენ.

კამათის დროს კობერიძემ კაკულიას უთხრა, რომ ის "ალიყურს მიიღებდა". კაკულიამ ეჭვი შეიტანა, რომ მისი ყოფილი თანაგუნდელი კანონპროექტის საკითხებში ღრმადაა ჩახედული, რასაც კობერიძემ უპასუხა, რომ კაკულია "სხვის დაკრულზე ცეკვავს".

ლევან კობერიძე: ეკონომიკური პოლიტიკის კომიტეტის თავმჯდომარე ხარ და ოთხი წელია რა ხდება ეკონომიკაში ვერც შენ გაგირკვევია და ვერც სხვას. არც პასუხი მოგითხოვია არავისთვის, თუ ძალიან გაინტერესებს.

რომან კაკულია: შენ ხო ხარ გარკვეული ძალიან...

კობერიძე: თუ ეგრე ლაპარაკი გინდა, შემიძლია გავაგრძელო, მათ შორის თუ გინდა ენერგეტიკა და გინდა ტელეკომუნიკაცია. რა პოლიტიკას ატარებ ერთი მითხარი, თუ იცი.

კაკულია: დიდი მადლობა, ყველაფერს გავარკვევთ. შენ რომ ძალიან გვიან გამოიღვიძე, ყველანი მოხარულები ვართ ამ გამოღვიძებით და გვინდა... როგორც ჩანს მძინარე ფორმაში შემოგიყვანეს ქართულ ოცნებაში და ბოლოს გამოიღვიძე...

კობერიძე: მე მგონია, რომ ძალიან პირად შეურაცხყოფაზე გადადიხარ და მაგისთვის ახლა ალიყურს მიიღებ...

კაკულია: როგორც იწყებ, ისე გპასუხობ...

კობერიძე: ალიყურს მიიღებ მაგისთვის ახლა, ასე მგონია, რა. მიიღებ ალიყურს-მეთქი და ღირსიც იქნები.

კაკულია: მომისმინე, შენი ბღვერის არავის არ ეშინია. მგონი, ექიმი ხარ და ბულინგის სპეციალისტი თუ ხარ აგვიხსენი, რა. შენი პოლიტიკური ბულინგის არავის არ გვეშინია აქ. გეხვეწები, რა. შენ შეაშინე, ვისაც შეშინებია ის და დაწყნარდი, თუ ძმა ხარ. მორჩი, რა, ამ რაღაც ბოდიალსა და დემაგოგიას

კობერიძე: შენ ხარ უზრდელი ახლა და მაგისთვის მიიღებ...

კაკულია: მაგასაც ვნახავთ, ვინ რას მიიღებ...

კობერიძე: დემაგოგიც ხარ და მიიღებ მაგარ ალიყურს და ცოტა ღირსება შეინარჩუნე...

კაკულია: გვიან გამოიღვიძე ძალიან...

კობერიძე: ვინ გამოიღვიძა გვიან, მაგას ვხედავ. შენ არ გამოგიღვიძია და კმაყოფილი ხარ.

პარლამენტში განიხილება სადაო კანონპროექტი, რომელიც ელექტრონული კომუნიკაციების სფეროს ეხება. პროექტი დაჩქარებული წესით განიხილება.

კანონპროექტის თანახმად, თუ კომისიის მიერ ავტორიზებული/ლიცენზიის მფლობელი პირისათვის დაკისრებული ჯარიმები ვერ უზრუნველყოფს კომისიის გადაწყვეტილების აღსრულებას, კომისია უფლებამოსილია დანიშნოს სპეციალური მმართველი, რომელიც აღასრულებს კომისიის გადაწყვეტილებას. ამავე კანონპროექტით, კომისიას მმართველის დანიშვნა 2-წლიანი ვადით შეუძლია და ის ანგარიშვალდებული მხოლოდ კომისიის წინაშეა.

აღნიშნულ ცვლილებას ოპოზიციაში საშიშს უწოდებენ და აღნიშნავენ, რომ ეს ბიზნესს დააზარალებს და ინვესტიციებს შეამცირებს. ცვლილებებს არ იზიარებენ სფეროს წარმომადგენლები.

კომუნიკაციების კომისიის ხელმძღვანელი კახა ბექაური კი ამბობს, რომ სახელმწიფოს ვალდებულებაა დაიცვას ქვეყნის უსაფრთხოება და მომხმარებლების უფლებები, ამისთვის კი აღსრულების ეფექტური მექანიზმია საჭირო.