"ბევრ თქვენს ტყუილს მოვუსმინე და მე გარანტიას გაძლევთ იმისას და მომავლშიც ასე იქნება, მაგრამ სანამ მე ვარ მედიის სფეროს ზედამხედველი, თქვენი თავისუფლება არ შეიზღუდება, ტყუილების თქმის უფლება მომავალშიც გექნებათ", — ასე მიმართა კომუნიკაციების ეროვნული კომისიის ხელმძღვანელმა, კახა ბექაურმა ტელეკომპანია კავკასიის დირექტორს, ნინო ჯანგირაშვილს. პასუხად ჯანგირაშვილმა მას ურჩია, ზედმეტი არ გაბედოს და უზრდელი უწოდა.

მანამდე ბექაურმა რამდენჯერმე დაადანაშაულა ჯანგირაშვილი ტყუილში და უთხრა:

"რაც შეეხება იმ ყალბ ინფორმაციას, რომელსაც თქვენ ავრცელებთ ამ საკითხზე და სხვა საკითხებზეც გაგივრცელებიათ, ეს ჯდება, რა თქმა უნდა, თქვენი გამოხატვის თავისუფლებაში, მაგრამ მისი მხილება, ასევე, ჯდება და მე ამას ყოველთვის გავაკეთებ, ჩემი გამოხატვის თავისუფლებაში".

პასუხად ჯანგირაშვილმა განაცხადა, რომ ბექაური თავხედურად იქცეოდა და მოუწოდა მას კონტროლი გაეწია და პატივი ეცა თანამდებობისთვის.

"თქვენი ტყუილების რეესტრი უნდა გავაკეთო, როგორ ბედავთ ამდენს საერთოდ", — უპასუხა მას ჯანგირაშვილმა, რასაც თავის მხრივ ბექაური გამოეხმაურა და განაცხადა, რომ ამით შეურაცხოფას ვერ მიაყენებს და მხოლოდ "თავის ღირსებას გაუსვამს ხაზს".

კანონპროექტის განხილვა კამათის ფონზე წარიმართა. ბექაური მედიის წარმომადგენლებს უმტკიცებდა, რომ ცვლილებები არ შეეხება მაუწყებელს და ეს ინფორმაცია ტყუილია. ამავდროულად, ჯანგირაშვილი მოუწოდებდა პარლამენტს, რომ გაიწვიონ ცვლილებები და მოსალოდნელ საფრთხეებზე აფრთხილებდა.

ცვლილებები, რომლებსაც მაუწყებლები და არასამთავრობო ორგანიზაციებიც აპროტესტებენ, კომუნიკაციების მარეგულირებელ კომისიას სპეციალური მმართველის დანიშვნის უფლებამოსილებას აძლევს.

კანონპროექტის თანახმად, თუ კომისიის მიერ ავტორიზებული/ლიცენზიის მფლობელი პირისათვის დაკისრებული ჯარიმები ვერ უზრუნველყოფს კომისიის გადაწყვეტილების აღსრულებას, კომისია უფლებამოსილია დანიშნოს სპეციალური მმართველი, რომელიც აღასრულებს კომისიის გადაწყვეტილებას. ამავე კანონპროექტით, კომისიას მმართველის დანიშვნა 2-წლიანი ვადით შეუძლია და ის ანგარიშვალდებული მხოლოდ კომისიის წინაშეა.

მედიის სფეროს წარმომადგენლები და იურისტები ფიქრობენ, რომ კანონპროექტი არამხოლოდ ელექტრონული კომუნიკაციების მქონე კომპანიებს, ინტერნეტ ან მობილურ პროვაიდერებს ეხებათ, არამედ ამ ცვლილებების მიზანი მაუწყებლთა ნაწილის გამოხატვის თავისუფლების შეზღუდვა და ცენზურის შემოტანის მცდელობაა.