ქართული ოცნების დეპუტატის, ირაკლი სესიაშვილი ფიქრობს, რომ ყოფილი პრეზიდენტის განცხადება რეაგირების გარეშე არ უნდა დარჩეს და მასზე პასუხი უკრაინას უნდა მოსთხოვონ. ამ თემაზე კომენტარი მან რუსთავი 2-თან გააკეთა.

"ის წარმოადგენს უკრაინის ხელისუფლებას, ის არის უკრაინის საჯარო მოხელე, შესაბამისად, მისი ეს განცხადება, როცა საუბრობს ამ ქვეყნის მთავრობის ლეგიტიმაციაზე, თავისთავად ცხადია, ის არ დარჩება რეაგირების გარეშე, იმიტომ, რომ ამაზე პასუხი მოეთხოვება უკრაინას. ამაზე ცხადია საგარეო უწყებას ექნება რეაგირება", — თქვა ირაკლი სესიაშვილმა.

მორიგ ვიდეომიმართვაში სააკაშვილი აღნიშნავს, რომ საქართველოს მთავრობის ლეგიტიმურობას არ აღიარებს და მას არაკანონიერად ცნობს.

"ჩემი ბრძოლა იქნება ძალიან გადამწყვეტი. მოსწონს ეს ვიღაცას, არ მოსწონს, უნდა ვიღაცას, რომ ვიყო წინა ხაზზე თუ არ ვიყო, მე ვიქნები წინა ხაზზე. გპირდებით, რომ მე ვიქნები თქვენთან ერთად, ხელჩაკიდებული, ოქტომბერში ივანიშვილის დამარცხების ფრონტზე და საქართველოს გადარჩენის ფრონტზე", — განაცხადა სააკაშვილმა.