ქართული ოცნების დეპუტატი, მიხეილ ყაველაშვილი ოპოზიციას უჯიშოთა ჯიშს და კურდღლებს უწოდებს. ეს შეფასება მან ყოფილი პრეზიდენტის მიხეილ სააკაშვილის განცხადებასთან დაკავშირებით რუსთავი 2-თან გააკეთა. სააკაშვილმა თქვა, რომ ოქტომბერში "ბრძოლის წინა ხაზზე იქნება".

"ვერ ვიკავებ თავს, ეს არის კურდღელი და კურდღლების პარტია აქვს, ეს არის უჯიშოთა ჯიში, აი ესე მინდა პირდაპირ ვთქვა, არაფერი საერთო არ აქვს ნაციონალობასთან და ეროვნულობასთან. ნებისმიერი მისი გამოჩენა არის დესტრუქცია, როცა ვსაუბრობთ, რომ ის არის ლიდერი ამ გაერთიანებული ოპოზიციის, ზოგიერთები უარყოფენ ამას, თუმცა შეხედეთ მის გამონათქვამებს, მის დამოკიდებულებას, მის რიტორიკას, პირდაპირ მოუწოდებენ დესტრუქციისკენ და დაპირისპირებისკენ", — თქვა ყაველაშვილმა.

მორიგ ვიდეომიმართვაში სააკაშვილი აღნიშნავს, რომ საქართველოს მთავრობის ლეგიტიმურობას არ აღიარებს და მას არაკანონიერად ცნობს.

"ჩემი ბრძოლა იქნება ძალიან გადამწყვეტი. მოსწონს ეს ვიღაცას, არ მოსწონს, უნდა ვიღაცას, რომ ვიყო წინა ხაზზე თუ არ ვიყო, მე ვიქნები წინა ხაზზე. გპირდებით, რომ მე ვიქნები თქვენთან ერთად, ხელჩაკიდებული, ოქტომბერში ივანიშვილის დამარცხების ფრონტზე და საქართველოს გადარჩენის ფრონტზე", — განაცხადა სააკაშვილმა.