ცენტრალური საარჩევნო კომისიის თავმჯდომარე თამარ ჟვანია აცხადებს, რომ საარჩევნო კოდექსში მნიშვნელოვანი ცვლილებები შევიდა, თუმცა არის საკითხები, რომელიც ცვლილებათა პაკეტში ვერ მოხდა. მათ შორის, ჟვანია საარჩევნო ადმინისტრაციის ფორმირების საკითხს გამოჰყოფს და აცხადებს, რომ საარჩევნო ადმინისტრაცია ეცდება, ეს პროცესი გამჭვირვალე იყოს.

"გეთანხმებით, რომ არის საკითხები, რომლებიც ამ ცვლილებებში ვერ მოხვდა და ამაზე ჩვენმა საერთაშორისო პარტნიორებმაც გააკეთეს განცხადებები. მათ შორის, მაგალითად შეიძლება იყოს, რომელიც აღინიშნა, რომ მნიშვნელოვანია საარჩევნო ადმინისტრაცისს დაკომპლექტების პროცესში მეტი გამჭვირვალობის ელემენტების შემოტანა. ეს იყო ელჩის განცხადებაში.

მინდა ხაზგასმით აღვნიშნო, რომ თავად საარჩევნო ადმინისტრაცია მაქსიმალურად ეცდება, რომ ეს პროცესი იყოს აბსოლუტურად გამჭვირვალე", — განაცხადა მან.

პარლამენტმა საარჩევნო კოდექსის ცვლილებათა პაკეტს მესამე მოსმენით მხარი დაუჭირა. პროექტი რამდენიმე სხვადასხვა კანონში ცვლილებას ითვალისწინებს, მათ შორის მოქალაქეთა პოლიტიკური გაერთიანების შესახებ კანონში, მაუწყებლის შესახებ კანონში, სისხლის სამართლისა და ადმინისტრაციულ სამართალდარღვევათა კოდექსებში და სხვა.

მმართველი გუნდის დეპუტატის, ირაკლი კობახიძის განმარტებით, ცვლილებების მიხედვით, იკრძალება საუბნო საარჩევნო კომისიაში იმ პირების დანიშვნა, რომლებიც წინა საერთო არჩევნებზე პარტიული ნიშნით იყვნენ წარმოდგენილი. რაც შეეხება კომისის ფორმირების წესს, კობახიძის განცხადებით:

"არაპარტიული ნიშნით არჩეულ წევრთა და ასარჩევ წევრთა წარდგენა მოხდება საოლქო კომისიაში არაპარტიული ნიშნით არჩეულ წევრთა უმრავლესობის მხარდაჭერით, რაც დამატებით ხელს შეუწყობს იმას, რომ მაქსიმალურად პროფესიული ნიშნით იყვნენ შერჩეული საუბნო საარჩევნო კომისიის წევრები".

არასამთავრობო სექტორი აცხადებს, რომ საარჩევნო ადმინისტრაციის ფორმირების წესი უნდა იყოს გამჭვირვალე და ფორმირება უნდა მომხდარიყო მხოლოდ პროფესიული ნიშნით.