არასამთავრობო ორგანიზაციები ხელისუფლებას მიმართავენ, დაუყოვნებლივ მოახდინოს შესაბამისი ცვლილებების მიღება და სტამბოლის კონვენციის რატიფიცირება.

კონვენცია ქალთა მიმართ ძალადობის საკითხის გარდა, ლგბტ, შეზღუდული შესაძლებლობების მქონე ქალთა, ეთნიკურ და რელიგიურ უმცირესობათა დაცვის საკითხებსაც არეგულირებს.

აღნიშნულ საკითხზე, დღეს, 5 დეკემბერს, არასამთავრობო ორგანიზაციებმა და მთავრობის წარმომადგენლებმა საქართველოს მიერ სტამბოლის კონვენციის რატიფიცირების საკითხი განიხილეს, როგორც ქალთა მიმართ ძალადობის შემცირების ერთ-ერთი მექანიზმი.

კონვენცია ორგანიზებული იყო კოალიცია თანასწორობისათვის მიერ

რა არის სტამბოლის კონვენცია და რა ეტაპზეა საქართველო?!

ევროსაბჭოს კონვენცია ქალთა მიმართ ძალადობისა და ოჯახში ძალადობის პრევენციისა და აღკვეთის შესახებ (სტამბოლის კონვენცია) მიიღეს სტამბულში 2011 წლის 7 მაისს. კონვენცია ევროპის ქვეყნებს ძალადობის წინააღმდეგ ბრძოლის ერთიანი სამართლებრივი მექანიზმებისა და იურიდიული ნორმების შემუშავებას ავალდებულებს. დოკუმენტზე ხელმომწერი ქვეყნები იღებენ ვალდებულებას, საკანონმდებლო დონეზე უზრუნველყონ ქალთა დაცულობა ოჯახური დანაშაულისაგან, აწარმოონ ქალთა მიმართ განხორციელებული ძალადობის სტატისტიკა; იზრუნონ ოჯახში ძალადობის შესახებ საზოგადოების ინფორმირებულობაზე, ძალადობის მსხვერპლთა რეაბილიტაციასა და დაცვაზე. დღეისათვის კონვენცია ევროპის საბჭოს 13 ქვეყნის მიერაა რატიფიცირებული.

2014 წლის 19 ივნისს საქართველოს იუსტიციის მინისტრის მიერ ხელი მოეწერა კონვენციას. იმისათვის, რომ საქართველოს მოეხდინა რატიფიცირება კონვენციასთან, ამისათვის, პირველ რიგში საჭირო იყო კანონმდებლობის სრულყოფა და მისი შესაბამისობაში მოყვანა კონვენციასთან. შესაბამისად, 2014 წლის მეორე ნახევარში საქართველოს იუსტიციის სამინისტრომ დაიწყო სტამბოლის კონვენციის სარატიფიკაციო პაკეტზე მუშაობა. მომზადებულ საკანონმდებლო ცვლილებათა პროექტებთან დაკავშირებით საჯარო კონსულტაციები 2015 წლის განმავლობაში მიმდინარეობდა თბილისსა და რეგიონებში.

საბჭოს ინიციატივითა და გაეროს ქალთა ორგანიზაციის მხარდაჭერით შეიქმნა სტამბოლის კონვენციის რატიფიცირების მოსამზადებელი ჯგუფი, რომელმაც გააანალიზა საქართველოში მოქმედი კანონმდებლობა კონვენციასთან შესაბამისობის თვალსაზრისით. საბჭოს ფარგლებში მიიღეს გადაწყვეტილება კონვენციის ხელმოწერასთან დაკავშირებით, რის შესახებაც საქართველოს საგარეო საქმეთა სამინისტრომ შესაბამისი განცხადება გააკეთა 2013 წელს ნიუ იორკში გამართულ გაეროს ქალთა სტატუსის კომისიის 57-ე სესიაზე.

მიუხედავად ზემოაღნიშნული ინფორმაციისა, ვერ მოხერხდა საკანონმდებლო ცვლილებათა პაკეტის დამტკიცება და შესაბამისად, საქართველოს არ მოუხდენია სტამბოლის კონვენციის რატიფიცირება.