რუსეთის საპატრიარქო საქართველოს მართლმადიდებელი ეკლესიის საპატრიარქოს წერილს პასუხობს და ამტკიცებს, რომ არასოდეს ჰქონიათ განზრახვა, რუსულ საარქიეპისკოპოსოში ქართული სამრევლო შეექმნათ. ასე უპასუხეს მათ ქართული მხარის წერილს, სადაც საუბარი იყო, რომ რუსული მხარე პარიზში ქართული სამრევლოს დაარსებას გეგმავდა, რაც საქართველოს საპატრიარქოსთვის მიუღებელია.

რუსული მხარის განმარტებით, პარიზში ერთ-ერთ სლავურ სამრევლოში მოღვაწე, ეროვნებით ქართველი მღვდელმონაზვნის, იეროთეოზის მარგველაშვილის მიერ გავრცელებული ინფორმაცია არასწორი იყო, რადგან მას მხოლოდ "ნაწილობრივ მისცეს უფლება, რომ მშობლიური ენა მისივე სიკეთისთვის გამოეყენებინა", რაც მან "სხვა მიზნებისთვის" გამოიყენა. მათივე თქმით, სწორედ სასულიერო პირის მიერ გავრცელებულმა ინფორმაციამ მიიყვანათ "სამწუხარო ინციდენტამდე".

მათივე ინფორმაციით, აღნიშნულის გამო მღვდელმონაზონ იეროთეოზს ღვთისმსახურების უფლება აეკრძალა.

ფოტო: საქართველოს საპატრიარქო

16 ივნისს საქართველოს საპატრიარქოს მიერ გარცელებული წერილის მიხედვით, ინტერნეტში გავრცელდა ინფორმაცია, რომ რუსულ მხარეს პარიზში ქართული სამრევლოს გახსნა და იქ ეროვნებით ქართველი სასულიერო პირისი წინამძღვრად დანიშვნა სურდა.

აღნიშნული ინფორმაციის შემდეგ საქართველოს საპატრიარქომ რუსეთის საპატრიარქოს მიმართა, რომ რუსეთის საპატრიარქოს მიერ პარიზში ქართული სამრევლოს დაარსების სურვილი მათთვის სრულიად მიუღებელი იყო.

როგორც საპატრიარქოს წერილში ვკითხულობთ, საქართველოს ფარგლებს გარეთ მყოფი ქართველებზე სულიერ მზურნველობას საქართველოს მართლმადიდებელი ეკლესია ახორციელებს და ამიტომ, რუსული მხარის მიერ ქართული სამრევლოს დაარსების სურვილი, სრულიად მიუღებელია. მათივე ინფორმაციით, რუსული მხარე ქართველებისათვის პირველი წირვის ჩატარებას 20 ივნისს გეგმავდა.