ბარსელონაში ლისეუს ოპერის თეატრი პანდემიის პერიოდში პირველად გაიხსნა, თუმცა საკმაოდ მშვიდი და ეკომეგობრული აუდიტორიით — დარბაზში კონცერტს 2 300-მდე ოთახის მცენარე დაესწრო.

ორგანიზატორების თქმით, მათ სურდათ ასე გადმოეცათ პანდემიის ზემოქმედება ადამიანებზე, რომლებსაც მაყურებლად ყოფნა ეზღუდებათ.

"მოდით გავაფართოოთ ჩვენი თანაგრძნობის უნარი. დავიწყოთ ხელოვნებითა და მუსიკით და ამ დიდებულ თეატრში ბუნება შემოვუშვათ", — ამ სიტყვებით გახსნა კონცერტი აღმასრულებელმა პროდიუსერმა ეუგენიო ამპუდიომ.

ფოტო: Nacho Doce

კონცერტის შემდეგ, სუკულენტები საჩუქრად გადასცეს მედიცინის სფეროს იმ წარმომადგენლებს, რომლებიც კორონავირუსის წინააღმდეგ წინა ხაზებზე ბრძოლას არ წყვეტენ.

ფოტო: Nacho Doce

ესპანეთში პანდემიის გამო დაწესებული საგანგებო მდგომარეობა კვირას, 21 ივნისს დასრულდა. კორონავირუსის შედეგები ქვეყანამ მძიმედ იწვნია, ვირუსით გარდაიცვალა 30 ათასამდე ადამიანი, დაინფიცირდა თითქმის 247 ათასი, ხოლო 150 ათასამდე გამოჯანმრთელდა.