ტყიბულელი მეშახტები ისევ საპროტესტო რეჟიმში არიან, მიზეზი ამჯერადაც უსაფრთხო სამუშაო პირობების მოთხოვნა და ხელფასების მატებაა. მათი განცხადებით, გუშინ, 9 ივნისს ამწე, რომელსაც ათეულობით მეშახტე გადაჰყავდა ჩავარდა. ისინი მოითხოვენ, რომ ამწე გარემონტდეს უსაფრთხოების სტანდარტების შესაბამისად და ეკონომიკის მინისტრის დაპირებისამებრ, ხელფასები გაეზარდოთ.

"ჩვენ არ ვიძახით იმას, არ წავალთ შიგნით, არ ვიმუშავებთო. ჩვენ გვინდა აღდგეს ყველაფერი სამართლიანად, უსაფრთხო მუშაობა და ხელფასების დანამატს ვითხოვთ, რომელიც გვეკუთვნის", — განუცხადა ერთ-ერთმა მეშახტემ რუსთავი 2-ს.

კურიერის ინფორმაციით, ამ წუთებში მინდელის შახტში დასაქმებულები კომპანიის წარმომადგენლებს ხვდებიან და მოლაპარაკება მიმდინარეობს.

ტყიბულელი მეშახტეები უსაფრთხოების პირობებისა და ხელფასის მატების მოთხოვნით არაერთხელ გაიფიცნენ. ერთ-ერთი ბოლო გაფიცვა 13 მარტს იყო, როცა მათ ერთი თვით ადრე, თებერვლის გაფიცვის დროს მიღწეული შეთანხმების პირობების შესრულება მოითხოვეს.

თებერვალში მუშები საფრთხის შემცველ სამუშაო გარემოს და სამუშაო პირობებს აპროტესტებდნენ. სამუშაო პროცესი მას შემდეგ აღდგა, რაც რეორგანიზაციის ბრძანებაში აისახა ის საკითხები, რომლებიც შრომით და სამართლებრივ უფლებებს არეგულირებდა.

ტყიბულელი მეშახტეები გასული წლის სექტემბერში გაიფიცნენ. მინდელისა და ძიძიგურის შახტებში, დახლოებით, 30 მეშახტე ჩავიდა და პროტესტის ნიშნად ადგილის დატოვებას არ აპირებდა. გაფიცვა 26 სექტემბერს შეწყვიტეს. ეკონომიკის მინისტრი ამ დღეს ტყიბულში ჩავიდა და მოლაპარაკებების შემდეგ განაცხადა, რომ გამოჩნდა ახალი ინვესტორი კომპანია, რომელმაც იკისრა ვალდებულება, გაისტუმროს, სოციალური გადასახადები, მათ შორის, დაზარალებული ოჯახების წინაშე.

ტყიბულში მეშახტეებს იგივე პრობლემებს 2018 წელსაც ჰქონდათ. მაშინ დასაქმებულები პრემიერ-მინისტრ მამუკა ბახტაძესთან შეხვედრას მოითხოვდნენ, რათა მათთვის წარედგინათ ოფიციალური დოკუმენტი, რომ ისინი შახტებში გამოძიების დასრულებამდე, ხელფასებს მიიღებდნენ. ტყიბულში 2018 წლის 16 ივლისს მინდელის შახტაში მომხდარ აფეთქებას 4 ადამიანის სიცოცხლე ემსხვერპლა. ამის გამო, საქართველოს შინაგან საქმეთა სამინისტრომ ტყიბულში არსებული 25-ვე შახტი დალუქა. მაშინდელმა პრემიერმა, მამუკა ბახტაძემ კი განაცხადა, რომ მინდელის შახტის დახურვის განმავლობაში მეშახტეებს ხელფასები აუნაზღაურდებოდათ.