Hover Camera ახალი ტიპის დრონის მაგვარი მოწყობილობაა, რომელიც დამოუკიდებლად ფარფატებს ჰაერში და მაღალი ხარისხის ფოტო/ვიდეოს გადაღება შეუძლია. მწარმოებელი ჩინური კომპანია Zero Zero Robotics-ია, რომელმაც ახალი პროდუქტი ორი დღის წინ, ორ წლიანი მუშაობის და 25-მილიონიანი დაფინანსების მიღების შემდეგ წარადგინა.

მფრინავი კამერა ოთხკუთხედი, მსუბუქი მოწყობილობაა. ოთხი პროპელერი ნახშირბადის ბოჭკოს დამცავ კორპუსშია მოქცეული, ასერომ გამოყენებისას, სტანდარტული დრონებისგან განსხვავებით, თითების წაცლის ან დაზიანების საფრთხე არ არსებობს.

იგი საკმაოდ კომპაქტურია და იკეცება. გაშლის შემდეგ, საჭიროა მხოლოდ ღილაკზე თითის დაჭერა, ჰაერში აგდება და კამერა მზადაა. დრონს სახის და სხეულის ამოცნობაც შეუძლია, რათა დააფიქსიროს გადასაღები ობიექტი და მოძრაობისას მიედევნოს კიდეც მას.

მოწყობილობისთვის მობილური ტელეფონის სპეციალური აპლიკაცია არსებობს, სადაც მომხმარებელი დრონის მდებარეობას აკონტროლებს. ამავე აპლიკაციით შეიძლება პანორამული ფოტოების გადაღება ან არჩევა, ვის მიედევნოს დრონი. გადაღებული ვიდეოების და ფოტოების ატვირთვა პირდაპირ ტელეფონშივე ხდება.

მოფარფატე კამერას 13-მეგაპიქსელიანი სენსორი აქვს და 4K ვიდეოს გადაღება შეუძლია. ასევე, აქვს დამატებითი კამერა კორპუსის ქვეშ, რომელიც ჰაერში გაჩერებისას წონასწორობის დაცვაში ეხმარება.

მიუხედავად ბოლო პერიოდში პოპულარული მეთოდისა, Hover Camera წინასწარ შეკვეთებს ან დაფინანსებას Kickstarter-ისგან არ იღებს. კომპანიის თქმით, კამერის პირდაპირი გაყიდვები ზაფხულის პერიოდში დაიწყება. ზუსტი ფასი ჯერჯერობით უცნობია, თუმცა მწარმოებლის პროგნოზით, ის $600-ზე მეტი არ ეღირება.