საზოგადოებრივი მაუწყებლის სამეურვეო საბჭომ არხის გენერალური დირექტორის ვაკანტურ პოზიციაზე კონკურსი გამოაცხადა.

განცხადების თანახმად, აპლიკაციების მიღება 29 ნოემბერს დაიწყება და 2016 წლის 28 დეკემბრამდე გასტანს. მსურველებმა განცხადება საზოგადოებრივი მაუწყებლის კანცელარიაში უნდა წარადგინონ.

მოთხოვნები კი ასეთია:

  • გენერალური დირექტორობის კანდიდატი უნდა იყოს საქართველოს მოქალაქე, საზოგადოებრივი აღიარებისა და ნდობის მქონე პირი.
  • გენერალური დირექტორობის კანდიდატს უნდა ჰქონდეს მაგისტრის ან მასთან გათანაბრებული აკადემიური ხარისხი.
  • არანაკლებ 10 წლის მუშაობის გამოცდილება, მათ შორის, ხელმძღვანელ თანამდებობაზე მუშაობის სულ ცოტა 3 წლისა და ჟურნალისტიკის, ადამიანის უფლებათა დაცვის ან/და სამეცნიერო-პედაგოგიურ სფეროში მუშაობის არანაკლებ 5 წლისა.

შესარჩევ კონკურსში მონაწილეობის მიღების მზაობა დაადასტურა ნინო ზაუტაშვილმა ჟურნალისტებთან საუბარში. მას ამჟამად საზოგადოებრივი მაუწყებლის ეთერში გადაცემა რეალური სივრცე მიჰყავს.

გენერალური დირექტორის პოზიციაზე შესარჩევ კონკურსში მონაწილეობის სურვილი გამოთქვა რამაზ სამხარაძემაც. სამხარაძე სამაუწყებლო კომპანია ჰერეთის რადიოსადგურების თბილისის და ჰერეთის დამფუძნებელი და დირექტორია.

21 ნოემბერს საზოგადოებრივი მაუწყებლის სამეურვეო საბჭომ დააკმაყოფილა უკვე ყოფილი გენერალური დირექტორის, გიორგი ბარათაშვილის განცხადება თანამდებობის დატოვების შესახებ.