ყოველდღე რამდენიმე კილომეტრს დარბიხარ, სახლში ყოფნისას ვარჯიში არ გეზარება, პანდემიამდე სპორტული დარბაზი შენი მეორე სახლი იყო, მაგრამ სასწორი სასურველ ციფრებს მაინც არ აჩვენებს? ამ სტატიაში ხუთ კითხვას დაგისვამთ. მათზე პასუხები კი, შესაძლოა, სასურველი შედეგის მიღწევაში დაგეხმაროთ.

1. ნამდვილად ახერხებ კალორიების დაბალანსებას?

წონაში დასაკლებად იმაზე მეტი კალორიის დახარჯვა გჭირდებათ, ვიდრე იღებთ. თუმცა, ერთია კალორიების შემცირება და მეორეა ზედმეტად დიდი რაოდენობის კალორიაზე უარის თქმა. ეს უკანასკნელი კი სახიფათოცაა, რადგან ამ გზით ვეღარ მიიღებთ საკმარის ენერგიას და ვარჯიშის გაგრძელებაც გაგიჭირდებათ. გარდა ამისა, თუკი დღის განმავლობაში კვებას არ დააბალანსებთ, შესაძლოა, საღამოს გემრიელად დანაყრებაზე უარის თქმაც გაგიჭირდეთ.

დღის განმავლობაში რამდენი კალორიის მიღება გჭირდებათ დამოკიდებულია იმაზე, თუ რამდენად ინტენსიურად ვარჯიშობთ. თუმცა, როგორც დიეტოლოგები ამბობენ, კალორიის დეფიციტი დღის განმავლობაში თქვენს ნორმაზე 500-ით ნაკლები არ უნდა იყოს, ხოლო საერთო ჯამში სჯობს, მათი უმეტესობა დღის პირველ ნაწილში მიიღოთ.

2. მუდმივად შიმშილის გრძნობა გაქვს?

ეს, შესაძლოა, სულაც არ იყოს ცუდი თუკი ვარჯიშის შემდეგ მადა მოგემატათ. თუმცა, ხშირ შემთხვევაში ადამიანები საკვებს იმ დროსაც იღებენ, როცა მაინცდამაინც არ შიათ. ეს ზოგჯერ რაიმე კონკრეტული საკვების მოთხოვნილებისგან ან თუნდაც სტრესისგანაა გამოწვეული. თუმცა, მიზეზს მნიშვნელობა არ აქვს, როგორც ვთქვით, თუ იმაზე მეტს იღებ ვიდრე წვავ, წონაში მატება გარდაუვალია.

დააკვირდით, იმიტომ ხომ არ გინდათ ჭამა, რომ მოიწყინეთ, დაიღალეთ ან ცუდ განწყობაზე ხართ? პასუხი მარტივია — ეცადეთ, საკვები მაშინ მიიღოთ, როცა ნამდვილად გშიათ, თანაც აირჩიოთ პროტეინითა და ბოჭკოთი მდიდარი საკვები — ბოსტნეული თუ დაბაკალორიული რძის პროდუქტები.

3. სმუზებს სახლში ამზადებ თუ მაღაზიაში ყიდულობ?

სმუზები ვარჯიშის განუყოფელ ნაწილად ითვლება, თუმცა ხშირად ის შაქრითა და კალორიითა სავსე და მარტივად შეუძლია, დახარჯული ენერგია წყალში ჩაგიყაროთ. კვების სპეციალისტები ამბობენ, რომ მაღალკალორიული ხილის, იოგურტისა და სხვადასხვა ტკბილი წვენისგან დამზადებული სმუზები ყველაზე დიდი "დამნაშავეები" არიან თქვენი წონის მომატების საკითხში.

გამოსავალი მარტივია: უკვე დამზადებული სმუზების ყიდვის ნაცვლად მარტივი სმუზები თავად სახლში მოამზადეთ. რაც მთავარია, ეცადეთ, სიარულისას მის დალევაზე უარი თქვათ. სხვადასხვა კვლევით დასტურდება, რომ როდესაც საკვებს (და სასმელსაც) დამჯდარი იღებ, ცოტაც საკმარისია იმისთვის, რომ თავი დანაყრებულად იგრძნოთ.

4. როგორ ითვლი კალორიებს?

სარბენი ბილიკებისა თუ სავარჯიშო ველოსიპედების ეკრანზე ხშირად არცთუ სწორი ციფრები წერია. სხვადასხვა კვლევები ადასტურებს, რომ სავარჯიშო დანადგარებში არსებული კალორიების მთვლელი, ზოგ შემთხვევაში, თქვენ მიერ დამწვარ კალორიებზე 30%-ით მეტს აჩვენებს, ასე რომ, თუკი მათ ენდობით, შესაძლოა ზედმეტი საკვების მიღება პრობლემად არ მოგეჩვენოთ.

ამიტომაც, სჯობს, არ მიაქციოთ ყურადღება სავარჯიშო მოწყობილობებს. კიდევ უფრო უკეთესია, თუ თქვენს ცხოვრებას კალორიების თვლაში თუ არ გაატარებთ, მაგრამ წონის დასაბალანსებლად, სჯობს მაინც თავად განსაზღვროთ, რამდენ კალორიას წვავთ ვარჯიშისას და იღებთ კვების შემდეგ. ამაში დაგეხმარებათ სხვადასხვა სახის აპლიკაცია — ფიტნეს ტრეკერი, რომელიც კარდიო-დანადგარებზე უფრო რეალისტურ სურათს დაგანახებთ.

5. როგორ გძინავს?

წონაში დაკლება ჯანსაღი კვების ვარჯიშისა და ძალების აღდგენის შედეგად მოდის. თუკი ამ სამიდან რომელიმე კომპონენტი ამოვარდება, სასურველი შედეგის დანახვა ნამდვილად გაგიჭირდებათ. ძალების აღდგენისთვის ძილი საუკეთესო გზაა, თუმცა ბევრი ჩვენგანი ამ რეჟიმს ხშირად უჩივის. არადა, თუკი საკმარისად არ გამოიძინებთ, თქვენს მადაზე პასუხისმგებელი ჰორმონების — ლეპტინისა და გრელინის გამომუშავება ირღვევა და შიმშილის გრძნობა ძლიერდება. გარდა ამისა, დადგენილია, რომ ოთხი დღის განმავლობაში ძილის რეჟიმის დარღვევის შემდეგ თქვენი ორგანიზმი ცხიმების "შეგროვებას" იწყებს, ამიტომ, ცხადია, დაკლება გაგიჭირდებათ.

პასუხი მარტივია და თან რთული — ეცადეთ, ჩამოაყალიბოთ თქვენზე მორგებული ძილის რუტინა. ზრდასრული ადამიანისთვის დღე-ღამეში 7-8 საათიანი ძილია რეკომენდებული. ცხადია, ეს სხვადასხვა ადამიანისთვის განსხვავდება, თუმცა თქვენი ბიოლოგიური საათის და ძილის რუტინის ჩამოყალიბებით ორგანიზმს ნორმალური ფუნქციონირებაში ხელს შეუწყობთ. ამგვარად, ვარჯიშის შედეგებიც უფრო მარტივად შესამჩნევი იქნება.