აშშ-ის ჰელსინკის კომისიის თავმჯდომარემ, სენატორმა როჯერ ვიკერმა, თანათავმჯდომარემ წარმომადგენელმა ჯო უილსონმა, სენატორებმა შელდონ უაითჰაუსმა და სტივ კოენმა გამოაქვეყნეს განცხადება, რომლითაც ეხმაურებიან გავრცელებულ ინფორმაციას იმის შესახებ, რომ საქართველოს ხელისუფლებამ მშვიდობიანი მომიტინგეების წინააღმდეგ ჭავლთან ერთად პირველი მსოფლიო ომის დროს გამოყენებული ქიმიური იარაღი გამოიყენა.

ორპარტიული ჰელსინკის კომისიის ხელმძღვანელობა მოუწოდებს აშშ-ს მთავრობას და მათ მოკავშირეებს მომხდარი გადაამოწმონ და დადასტურების შემთხვევაში პასუხისმგებელ პირებს შესაბამისი პასუხისმგებლობა მოსთხოვონ.

"ბოლოდროინდელი დასკვნები, რომ "ქართულმა ოცნებამ" გასულ წელს მშვიდობიანი მომიტინგეების წინააღმდეგ ქიმიური იარაღი გამოიყენა, ძალიან შემაშფოთებელია. ამ ქიმიურმა თავდასხმებმა მსხვერპლებს დამწვრობა და ჯანმრთელობის გრძელვადიანი გართულებები მიაყენა და წარმოადგენს ადამიანის უფლებების დაცვის ვალდებულებების დარღვევას, რომლის შესრულების ვალდებულებაც საქართველოს ხელისუფლებას აქვს. ასეთი ქცევა "ქართულ ოცნებას" რუსეთისა და ჩინეთის კორუმპირებულ მმართველებთან ალიანსში აყენებს, რომლებსაც საკუთარი ხალხის ეშინიათ და არაფრის წინაშე არ გაჩერდებიან ხელისუფლებაში ყოფნის შესანარჩუნებლად

მოვუწოდებთ აშშ-ის მთავრობას და ჩვენს დემოკრატ მოკავშირეებს, გადაამოწმონ ეს ინფორმაცია და შესაბამისი სანქციები დააწესონ პასუხისმგებელ პირებზე. ჩვენ კვლავ მოვუწოდებთ ჩვენს კოლეგებს კონგრესში, მიიღონ "MEGOBARI აქტი", ორპარტიული კანონმდებლობა, რომელიც სახელმწიფო დეპარტამენტს დამატებით ინსტრუმენტებს მისცემს ქართველი ხალხის თავისუფლებისთვის ბრძოლის მხარდასაჭერად.

კვირას, 30 ნოემბერს, BBC-მ გაავრცელა ინფორმაცია, რომ საქართველოს ხელისუფლებამ გასულ წელს მომიტინგეების წინააღმდეგ წყლის ჭავლში გამოიყენა ქიმიური ნივთიერება "კამიტის" სახელით ცნობილი ნივთიერება. ანგარიშის თანახმად, რომელიც ეყრდნობა ექსპერტებისა და საქართველოს სპეცრაზმის ინფორმატორების ინფორმაციას, ქიმიური ნივთიერება გამოიგონეს პირველი მსოფლიო ომის დროს გამოსაყენებლად და 1930-იან წლებში ამოიღეს მიმოქცევიდან ჯანმრთელობაზე გრძელვადიანი ეფექტის გამო. ეს გამჟღავნება მაშინ ხდება, როდესაც ქართველები ყოველდღიური დემონსტრაციების მეორე წელს იწყებენ, რომლებიც აპროტესტებენ მმართველი პარტიის ქართული ოცნების გადაწყვეტილებას არჩევნების გაყალბებისა და საქართველოს ევროატლანტიკური ინტეგრაციისკენ მიმავალი გზის ჩაშლის შესახებ. 2024 წლის ოქტომბერში საპროტესტო აქციების დაწყებიდან, ქართულმა ოცნებამ ქვეყანა ავტორიტარიზმს დააახლოვა დამოუკიდებელი მედიის ჩახშობით, დისიდენტების დაპატიმრებით და რუსეთთან და ჩინეთთან ურთიერთობების გაღრმავებით", — წერია გავრცელებულ განცხადებაში.

შეგახსენებთ, BBC-ის ინფორმაციით, "ქართულმა ოცნებამ” 2024 წლის აქციებზე დემონსტრანტების დასაშლელად I მსოფლიო ომის დროინდელი ტოქსიკური ნაერთი "კამიტე" გამოიყენა.