უკვე წლებია ყოველი მაისის მოახლოებას მკითხველები განსაკუთრებულად ელოდებიან, რადგან გაზაფხულის მიწურულს ნამდვილი ლიტერატურული დღესასწაული — თბილისის წიგნის საერთაშორისო ფესტივალი იმართება.

წელს კორონავირუსის პანდემიამ სხვა ბევრი რამის მსგავსად, რა თქმა უნდა, ფესტივალის ჩატარებაც ეჭვქვეშ დააყენა, თუმცა ოპტიმალური გამოსავალი ამ შემთხვევაშიც მალევე გამოიძებნა: წიგნების ვირტუალური ყიდვა-გაყიდვა!

მართალია, მკითხველებისთვის ცალკე ბედნიერება იყო გამომცემლობების სტენდებთან სეირნობა და სასურველი საკითხავის შერჩევა, მაგრამ ამჯერად რიგების და ხალხმრავლობის გარეშე შესაძლებლობა გეძლევათ 30-31 მაისს ონლაინ შეიძინოთ წიგნები, რომლებსაც სახლში მოგიტანენ.

ამ სტატიაში კი იმ რამდენიმე გამორჩეულ ლიტერატურულ სიახლეზე გიამბობთ, რომლებიც ლიტერატურის მოყვარულებს წლევანდელ ფესტივალზე არ უნდა გამორჩეთ.

1. არსთა მესნევი — ჯალალ ედ-დინ რუმი

მკითხველების ერთ-ერთ ყველაზე საყვარელ წიგნების სერიას მსოფლიო კლასიკა გამოჩენილი სპარსელი პოეტი ჯალალ ედ-დინ რუმი შეემატა, რომელიც მეცამეტე საუკუნეში მოღვაწეობდა და დღემდე უსაზღვროა მისი შემოქმედების გავლენა სხვადასხვა ხალხის ცხოვრებასა და კულტურაზე.

მკითხველს შესაძლებლობა ეძლევა ამ უმნიშვნელოვანესი ავტორის გამორჩეული ნაწარმოები არსთა მესნევი ქართულად წაიკითხოს და თანაც გიორგი ლობჟანიძის თარგმანით. ლიტერატურის ბევრმა მოყვარულმა კარგად იცის, რომ ეს სახელი და გვარი მაღალი ხარისხის თარგმანის გარანტს იძლევა და სპარსული პოეზიის ამ უძვირფასესი მარგალიტით ისევე დატკბებით მშობლიურ ენაზე, თითქოს, ორიგინალში წაგეკითხოთ.

2. მეკარის შიში თერთმეტმეტრიანის მოლოდინში — პეტერ ჰანდკე

წლევანდელი წიგნების ფესტივალზე დაანონსებულ სიახლეებს შორის უდაოდ ერთ-ერთი ყველაზე მნიშვნელოვანი ახალი თარგმანი პეტერ ჰანდკეს ცნობილი რომანია მეკარის შიში თერთმეტმეტრიანის მოლოდინში. ამ ავსტრიელ მწერალს გასულ წელს ნობელის პრემია გადაეცა ლიტერატურის დარგში და ქართველ მკითხველებსაც შესაძლებლობა ეძლევათ მის შემოქმედებას საეტაპო რომანით გაეცნონ.

ეს მცირე რომანი, რომელიც გერმანულიდან მაია ფანჯიკიძემ გადმოაქართულა, დეტექტიური ჟანრისთვის დამახასიათებელი დაძაბულობით იწყება და მკითხველს კრიზისში მყოფი მთავარი პერსონაჟის შინაგანი სამყაროს დაფარულ კუნჭულებში ამოგზაურებს. წიგნის მიხედვით ცნობილმა რეჟისორმა ვიმ ვენდერსმა ამავე სახელწოდების ფილმიც გადაიღო, შესაბამისად, ეს სიახლე კინომოყვარულებსაც დააინტერესებთ.

3. მაშენკა — ვლადიმირ ნაბოკოვი

სხვა მილიონობით ლიტერატურის მოყვარულთან ერთად ქართველი მკითხველები ერთ-ერთ ყველაზე გამორჩეულ რუსულ და ინგლისურენოვან ავტორს, ვლადიმირ ნაბოკოვს მისი გახმაურებული რომანით ლოლიტა იცნობენ. არადა ის კიდევ არაერთი ნაკლებად ცნობილი ნაწარმოების ავტორიცაა, რომელშიც არანაკლებად ჩანს მისი უკიდეგანო ოსტატობა.

მათ შორის ერთ-ერთი კი მაშენკაა, რომელიც ნაბოკოვმა 1926 წელს მშობლიურ, რუსულ ენაზე დაწერა და ბოლშევიკური რუსეთიდან გაქცეულმა მწერალმა ავტობიოგრაფიული ელემენტებით ემიგრაციაში მყოფი ახალგაზრდა კაცის განცდების შესახებ მოგვითხრო. ეს მცირე მოცულობის ნაწარმოები ნაბოკოვის პირველი რომანია, რომელიც 27 წლის ასაკში შექმნა, შესაბამისად, მისი შემოქმედების მოყვარულთათვის განსაკუთრებით საინტერესო იქნება ამ გენიალურ მწერლის ადრეულ ფიქრებთან გაცნობა.

4. ახლა კი გასულ წელს დაველოდოთ — ფილიპ დიკი

ამ ფესტივალზე ხელცარიელები არც ჟანრული ლიტერატურის მოყვარულები დარჩებიან: იმასთან ერთად, რომ ბოლო წლებში ფენტეზისა თუ სამეცნიერო ფანტასტიკის ჟანრში არც ისე ცოტა ახალი ქართული თარგმანი დაგროვდა, მკითხველები მუდმივად განებივრებული არიან სიახლეებითაც.

წლევანდელ ვირტუალურ ფესტივალზე კი შესაძლებლობა გექნებათ სამეცნიერო ფანტასტიკის საკულტო მწერლის, ფილიპ დიკის რომანი ახლა კი გასულ წელს დაველოდოთ შეიძინოთ, რომლის სათაურიც კი კმარა მკითხველის ცნობისმოყვარეობის გასაღვივებლად.

5. სეროტონინი — მიშელ უელბეკი

მიშელ უალბეკი თანამედროვე მსოფლიო ლიტერატურის ერთ-ერთი ყველაზე ცნობილი წარმომადგენელია, რომლის შემოქმედებითაც საქართველოში განსაკუთრებულად დაინტერესებულები არიან: იმასთან ერთად, რომ მისი რომანების ქართული თარგმანები ბესტსელერების სიაში ხშირად ლიდერობს, თავად მწერალიც ესტუმრა ჩვენს ქვეყანას და მკითხველებს შეხვდა.

ისეთი გახმაურებული წიგნების შემდეგ კი, როგორებიცაა პლატფორმა, მორჩილება და ელემენტარული ნაწილაკები, ქართველ მკითხველებს შესაძლებლობა ეძლევათ უკვე მის ჯერჯერობით ბოლო რომანს სეროტონინი გაეცნონ, რომელიც უელბეკისთვის დამახასიათებელი წერის სტილით კვლავ უსაზღვრო დეპრესიით გაჟღენთილ ისტორიაზე მოგვითხრობს.

მთავარი არხის გადაცემა შუადღეში საგამომცემლო სექტორის წარმომადგენლებმა სწორედ 30-31 მაისს დაგეგმილ თბილისის წიგნის ვირტუალურ ფესტივალსა და იმ გამოწვევეზე ისაუბრეს, რომელთა წინაშეც პანდემიის გამო საგამომცემლო სფერო აღმოჩნდა.