"თბილისის სურვილი, აფხაზეთი საქართველოს დაუბრუნდეს, "ფანტომური ტკივილია", — განაცხადა ოკუპირებული აფხაზეთის ე.წ. საგარეო საქმეთა მინისტრმა, ოლეგ ბარციცმა რუსულ მედიასთან ინტერვიუში.

"ეს იმის შედეგია, რომ საქართველოს ხელმძღვანელობის ფანტომური ტკივილები ჯერ კიდევ არ არის დაძლეული; ქართული ისტებლიშმენტის მნიშვნელოვან ნაწილს კვლავ სურს აფხაზეთის საქართველოსთვის დაბრუნება. ეს უტოპიაა", — განაცხადა ე.წ. მინისტრმა კითხვაზე — რატომ არ მოაწერეს ხელი სოხუმმა და თბილისმა ძალის გამოუყენებლობის შესახებ შეთანხმებას.

ბარციცის თქმით, "საქართველოში ზოგიერთ გონიერ პოლიტიკოსს უკვე ესმის, რომ აფხაზეთი მის შემადგენლობაში არ დაბრუნდება, თუმცა ისინი ამას ხმამაღლა არ ამბობენ".

"საქართველოში ზოგიერთ გონიერ პოლიტიკოსს უკვე ესმის, რომ აფხაზეთი მის შემადგენლობაში არ დაბრუნდება, თუმცა ისინი ამას ხმამაღლა არ ამბობენ", — აღნიშნა ბარციცმა.

შეგახსენებთ, რომ რუსეთის გარდა, აფხაზეთი ოფიციალურად აღიარა კიდევ ოთხმა ქვეყანამ: ნიკარაგუამ, ვენესუელამ, ნაურუმ და სირიამ.