ბელარუსის პრეზიდენტმა ალექსანდრე ლუკაშენკომ მინსკში ჩინეთის ლიდერის, სი ძინპინის ძეგლის აღმართვის წინადადება წამოაყენა. ეს იდეა მან 7 ივნისს ეროვნული საფეხბურთო სტადიონის საზეიმო გახსნის ცერემონიაზე გააჟღერა. ინფორმაცია ბელორუსის სახელმწიფო საინფორმაციო სააგენტო BELTA-მ გაავრცელა.

ლუკაშენკომ განაცხადა, რომ ბელარუსის დედაქალაქში ახალი სტადიონი და საცურაო აუზი "ჩინელი ხალხის საჩუქარია". ამ პროექტებში "არც ერთი ბელორუსული რუბლი" არ დახარჯულა.

"ჩვენ ოფიციალურად ვხსნით ყველაზე დიდ „ძეგლს“. შესასვლელთან ვთქვი (სტადიონის მახლობლად დამონტაჟებულია სკულპტურული კომპოზიცია, რომელზეც გამოსახულია ბელარუსისა და ჩინეთის ფეხბურთელები): სწორედ აქ უნდა დავუდგათ ძეგლი ჩემს მეგობარ სი ძინპინს. რადგან მხოლოდ მისი წყალობით ააშენეს ჩინელებმა ეს სტადიონი საკუთარი ხარჯებით", — თქვა ლუკაშენკომ.

ღონისძიებას ჩინეთის ოლიმპიური კომიტეტის ვიცე-პრეზიდენტი ჟანგ ჯიაშენგიც დაესწრო. მან სტადიონს ბელარუსსა და ჩინეთს შორის "მტკიცე მეგობრობისა და ნაყოფიერი თანამშრომლობის" სიმბოლო უწოდა.