მას შემდეგ, რაც ბენისიო დელ ტორო უეს ანდერსონის ხშირი თანამშრომლების სიას შეუერთდა, შესაძლოა, კიდევ ერთ სიაშიც აღმოჩნდა.

ოსკარის მფლობელმა მსახიობმა, რომელიც უეს ანდერსონის ახალ ფილმში The Phoenician Scheme თამაშობს, გაამხილა, რომ ფილმის სცენარი TSA-ს (ტრანსპორტის უსაფრთხოების ადმინისტრაციის) ყურადღების ქვეშ მოხვდა, მასში არსებული საეჭვო სცენების გამო.

"სცენარი ხელბარგში მედო. ბოსტონში ვიყავი და ლოს-ანჯელესში მივფრინავდი", — გაიხსენა დელ ტორომ Late Night with Seth Meyers-ის ეთერში. "რაღაც მიზეზით, კომპიუტერიც იქ მედო და არ ამომიღია, ამიტომ TSA-ს თანამშრომლებმა მითხრეს: 'შენი ჩანთა უნდა შევამოწმოთ' ვუთხარი — კარგი. გახსნა ჩანთა, ჩაიხედა — მე კი ჩემს სცენარებს ყოველთვის დიდი სათაურებით ვბეჭდავ, რომ მარტივად ვიპოვო საჭირო ადგილი".

დელ ტორომ დაამატა:

პირველი სცენა იყო — ინტერიერი, თვითმფრინავი: ბომბი. მეორე სცენა — ინტერიერი, კაბინა: პილოტის კატაპულტირება. მესამე სცენა — ავარია.

"კაცი კითხულობს ამ ყველაფერს. ვეუბნები — ეს ფილმის სცენარია, ეს ფილმის სცენარია-მეთქი", გააგრძელა მსახიობმა. "მან კი თითი ამიწია, ერთი წუთითო, დახურა ჩანთა და გავიდა. შემდეგ TSA-ს ხუთი თანამშრომელი მოვიდა და დაიწყეს სცენარის კითხვა. ბოლოს უფროსიც მოვიდა, შემომხედა — მგონი მიცნო, ალბათ სიკარიოდან ან ტრეფიკიდან — და გამიშვეს.“

მიუხედავად იმისა, რომ ამ ინციდენტმა მის მგზავრობა ცოტათი შეაფერხა, დელ ტორომ თქვა, რომ თანამშრომელი სწორად მოიქცა — "იცით რა? ვუფასებ საქციელს, იმიტომ, რომ ყურადღებით იყო".

The Phoenician Scheme, რომელიც ვეს ანდერსონის მეთოთხმეტე სრულმეტრაჟიანი ფილმია, ამჟამად კინოთეატრებში გადის. დელ ტორო ფილმში ასრულებს მდიდარი ბიზნესმენის — ზა-ზა კორდას — როლს, რომელიც სასიკვდილო დევნის სამიზნე ხდება მას შემდეგ, რაც თავისი მონაზონ ქალიშვილს, (მია თრიპლტონი), მისი ქონების ერთადერთ მემკვიდრედ ნიშნავს.