თბილისის საქალაქო სასამართლოში კოალიცია ძლიერი საქართველოსთვის ლიდერების, მამუკა ხაზარაძისა და ბადრი ჯაფარიძის და სტრატეგია აღმაშენებლის ლიდერის, გიორგი ვაშაძის სასამართლო პროცესები გაიმართება.

მათ ოცნების ხელისუფლების პარლამენტის დროებით საგამოძიებო კომისიაზე გამოუცხადებლობას ედავება.

მამუკა ხაზარაძის პროცესი 10:00 საათზეა ჩანიშნული, ბადრი ჯაფარიძის — 11:00-ზე და გიორგი ვაშაძის — 14:00 საათზე.

შეგახსენებთ, რომ ოცნების ხელისუფლების პარლამენტის დროებით საგამოძიებო კომისიაზე გამოუცხადებლობის გამო შეფარდებული გირაო 50 000 ლარი სამივე მათგანმა გადაიხადა.

მათ ბრალი სისხლის სამართლის კოდექსის 349-ე მუხლით აქვთ წარდგენილი, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. აღნიშნული ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.