სომხეთის პრემიერმინისტრი ნიკოლ ფაშინიანი ეკლესიის წინააღმდეგ კამპანიას აგრძელებს. მან სოციალურ ქსელში ახალი პოსტი გამოაქვეყნა, სადაც წერს, რომ სახელმწიფო ხალხს ეკუთვნის და დაუბრუნეს უკვე ხალხს, ეკლესიაც ხალხს ეკუთვნის და ისიც ხალხს უნდა დაუბრუნონ.

"სახელმწიფო (ძალაუფლება) ხალხს ეკუთვნის. ეკლესია ხალხს ეკუთვნის. ჩვენ სახელმწიფო (ძალაუფლება) ხალხს დავუბრუნეთ. „ჩვენ ასევე ეკლესია უნდა დავუბრუნოთ ხალხს", — წერს ის.

მანამდე ის სომხეთის კათალიკოს პატრიარქს გარეგინ II-ს დაესხა თავს და განაცხადა, რომ "თუ აღმოჩნდება, რომ გარეგინ II-მ მართლაც დაარღვია უქორწინობის აღთქმა და შვილი ჰყავს, ის ვერ იქნება ყოველთა სომეხთა კათოლიკოსი".

"ყოველთა სომეხთა კათოლიკოსს არ შეუძლია, ასეთი პირადი ცხოვრება ჰქონდეს. ამ საკითხს ვსვამ როგორც სომხური სამოციქულო ეკლესიის მიმდევარი, რადგან სულიერი უსაფრთხოების საკითხს ვხედავ და ამაზე სომხეთის პრემიერ-მინისტრის რანგში ვსაუბრობ. ვხედავ სახელმწიფო უსაფრთხოების საკითხს. წმინდა ეჩმიაძინმა ამ სიტუაციასთან დაკავშირებით პოზიცია უნდა დაიკავოს", — განაცხადა ფაშინიანმა.

ამას გარდა, როგორც რადიო თავისუფლება წერს, სომხური ოპოზიციური გაზეთი "ჰრაპარაკი" (Hraparak) წყაროებზე დაყრდნობით იუწყება, რომ პრემიერმინისტრმა ნიკოლ ფაშინიანმა, სომხურ ეკლესიასთან გამწვავებული დაპირისპირებისა და გუნდში უკმაყოფილების ფონზე, თანაგუნდელებს უთხრა, რომ ეკლესია რუსეთისგან იღებს მითითებებს.

გარეგინ II ნიკოლ ფაშინიანის მთავრობასთან დაპირისპირებულია. ის ნიკოლ ფაშინიანის გადადგომას 2020 წლის დეკემბრის შემდეგ ითხოვს, ფაშინიანის მთავრობა კი პატრიარქს პოლიტიკაში ჩარევაში ადანაშაულებს.

29 მაისს სომხეთის პრემიერმინისტრმა ეკლესიები უსარგებლო ნივთების საკუჭნაოს შეადარა. კრიტიკულია მისი მეუღლე ანნა ჰაკობიანიც, რომელმაც სასულიერო პირებს პედოფილები და "მაფიოზები" უწოდა, – წერს რადიო თავისუფლება.