კოლუმბიის დედაქალაქ ბოგოტაში სენატორსა და პოტენციურ პრეზიდენტობის კანდიდატ მიგელ ურიბეზე მკვლელობის მცდელობა განხორციელდა. მას, სავარაუდოდ, 15 წლის ბიჭმა ესროლა.

გენერალური პროკურატურის ცნობით, 15 წლის მოზარდი დაკავებულია.

CNN-ის ცნობით, ოპოზიციური კონსერვატიული დემოკრატიული ცენტრის პარტიის 39 წლის წევრი მომავალ წელს საპრეზიდენტო არჩევნებში მონაწილეობას აპირებდა.

"შეიარაღებულმა პირმა მას ზურგში ესროლა, როდესაც ის საარჩევნო ღონისძიებაში მონაწილეობდა დაახლოებით საღამოს 5 საათზე", — ნათქვამია პარტიის განცხადებაში.

ბოგოტას მერმა კარლოს გალანმა განაცხადა, რომ ურიბე დედაქალაქის ფონტიბონის უბანში მომხდარი თავდასხმის შემდეგ სასწრაფო სამედიცინო დახმარებას იღებს და თავდასხმაში ეჭვმიტანილი დაკავებულია.

მკვლელობის მცდელობა დაგმეს კოლუმბიის მთავრობამ და დემოკრატიული ცენტრის პარტიამ, ასევე ყოფილმა პრეზიდენტებმა და სხვა რეგიონულმა ლიდერებმა.

კოლუმბიის პრეზიდენტმა გუსტავო პეტრომ სენატორის ოჯახს სოლიდარობა გამოუცხადა.

კოლუმბიის საგარეო საქმეთა სამინისტრომ თავდასხმას "დემოკრატიაზე, განსხვავებულობის პატივისცემასა და ჩვენს ქვეყანაში პოლიტიკური საქმიანობის თავისუფალ განხორციელებაზე პირდაპირი თავდასხმა" უწოდა. მან მოუწოდა ხელისუფლებას, "სრულად გამოიძიონ ამ სერიოზული ინციდენტის გარემოებები".

დემოკრატიული ცენტრის პარტიამ სროლას "ძალადობის მიუღებელი აქტი" უწოდა.

სულ მცირე ოთხმა ყოფილმა პრეზიდენტმა — ერნესტო სამპერმა, ალვარო ურიბემ, ხუან მანუელ სანტოსმა და ივან დუკემ — დაგმეს ეს ქმედება.

ეკვადორის პრეზიდენტმა დანიელ ნობოამ ურიბეს ოჯახს სამძიმარი გამოუცხადა და დასძინა, რომ გმობს ძალადობისა და შეუწყნარებლობის ყველა ფორმას.

ბოგოტაში გაეროს ადამიანის უფლებათა ოფისმა ხელისუფლებას მოუწოდა, გამოიძიონ მომხდარი და პასუხისგებაში მისცენ დამნაშავეები.

"ჩვენ მოვუწოდებთ პოლიტიკურ უფლებებსა და ძალადობისგან თავისუფალ პოლიტიკურ დებატებს", — წერს გაეროს ადამიანის უფლებათა ოფისი X-ზე.