მოსწავლე ახალგაზრდობის სასახლის წინ გამართულ ღონისძიებაზე პირველი რესპუბლიკის ისტორიული მოვლენების ფოტოებია გამოფენილი. მცირე გამოფენა დამოუკიდებლობის დღის აღსანიშნავად ევროპულმა საქართველომ მოაწყო.

ცალკე სტენდი დაეთმო საქართველოს დემოკრატიული რესპუბლიკის დამფუძნებელი კრების რეპრესირებულ და დახვრეტილ დეპუტატებს. 1921 წლის მარტში დამფუძნებელი კრების 139 დეპუტატიდან, ემიგრაციაში 31 წავიდა, საიდანაც საბჭოთა რუსეთმა ორი მოკლა. ქვეყანაში დარჩენილი 108 დეპუტატიდან კომუნისტურმა რეჟიმმა 51 სიკვდილით დასაჯა, 42 სხვადასხვა დროს იყო რეპრესირებული.

ფოტო: On.ge / ანა ვახტანგაძე

ფოტო: On.ge / ანა ვახტანგაძე

ფოტო: On.ge / ანა ვახტანგაძე

ევროპული საქართველოს წევრისა და პარლამენტის დეპუტატის გიორგი კანდელაკის თქმით, 102 წლის შემდეგ დრო მოვიდა, რომ 26 მაისი ახლებურად გავიაზროთ.

"სწორედ ამიტომ, იმ შენობის წინ, სადაც გამოცხადდა საქართველოს რესპუბლიკის დამოუკიდებლობა, ევროპულმა საქართველომ პატარა გამოფენა გააკეთა, მათ შორის დემოკრატიულად არჩეული დამფუძნებელი კრების რეპრესირებული და დახვრეტილი წევრების გამოსახულებებით. ჩვენი ვალია არამხოლოდ არ დავივიწყოთ იმ ადამიანების ღვაწლი, ვინც შექმნა და ვინც იბრძოდა საქართველოს დამოუკიდებლობისთვის, არამედ გავიაზროთ, თუ რა შეიქმნა 26 მაისს, როგორ ცხოვრობდა ამ სამი წლის განმავლობაში საქართველოა დემოკრატიული რესპუბლიკა, რაოდენ ცივილიზებული და პროგრესული ქვეყანა იყო", — აღნიშნა მან.

ამასთან, დეპუტატი გამოდის ინიციატივით, მოსწავლე-ახალგაზრდობის სასახლეში იმ დარბაზის რესტავრაცია მოხდეს, რომელშიც დამფუძნებელი კრება მუშაობდა და თან ისე, რომ ამჟამინდელი ფუნქცია შეძლებისდაგვარად შეინარჩუნოს:

"მომავალში საზეიმო და განსაკუთრებულ შემთხვევებში სხდომები გაიმართოს სწორედ ამ დარბაზში, ისტორიული აქტები, რომელიც მალე იქნება დარწმუნებული ვარ, როგორიცაა საქართველოს ნატოში და ევროკავშირში გაწევრიანება, ამის რატიფიცირება მოხდეს ამ დარბაზში. ეს იქნება ისტორიული სამართლის აღდგენა", — ამბობს კანდელაკი.