პარლამენტის დამოუკიდებელი დეპუტატი, ეკა ბესელია ამბობს, რომ საპატრიარქოსთვის ყველა ეკლესიასთან მდებარე ტყეების გადაცემის უფლების მიცემა შეიძლება განვიხილოთ ეკლესიასა და სახელმწიფოს შორის არსებული კონსტიტუციური შეთანხმების ჭრილში, რადგან კონკორდატი ეკლესიას პრივილეგირებულ მდგომარეობაში აყენებს.

"ამ პროექტს ბევრი სხვადასხვა საკითხი აქვს, მაგრამ რაც შეეხება საკითხს [ეკლესიებზე], რამდენად შეიძლება ის იყოს სამართლებრივად ან კონსტიტუციურად, მე მაინც შევხედავდი ამას კონსტიტუციური შეთანხმების ჭრილში. რადგან არსებობს კონკორდატი, ეს უკვე ნიშნავს რომ პრივილეგირებულ და განსაკუთრებულ მდგომარეობაში აყენებს ის მართლმადიდებელ ეკლესიას. ეს კონსტიტუციით განსაზღვრულია, ამიტომ ნებისმიერი შეღავათი, რომელიც არის გამომდინარე კონკორდატიდან, შეიძლება იყოს წაკითხული ამ შეთანხმების პრინციპებიდან", — თქვა ბესელიამ.

დეპუტატმა იქვე აღნიშნა, რომ "თუმცა ეს, რა თქმა უნდა, არ ნიშნავს იმას, რომ სხვა კონფესიების უფლებები ისევ კონსტიტუციის ჭრილში არ იყოს დაცული".

საქართველოს პარლამენტმა დღეს დაამტკიცა ტყის კოდექსი, რომელიც, მათ შორის, ითვალისწინებს იმას, რომ საპატრიარქოს საკუთრებაში შეიძლება გადაეცეს საქართველოში არსებული ყველა ეკლესია-მონასტრის მიმდებარე ტყის ფართობი, არაუმეტეს 20 ჰექტრისა თითოეულის შემთხვევაში.