პარლამენტში უმრავლესობის ლიდერი, მამუკა მდინარაძე ამბობს, რომ პრემიერმინისტრის პარლამენტში მისვლის პრობლემა არაა. მისივე თქმით, პრემიერი ინტერპელაციის წესითაც წარდგენა და შემდეგ ანგარიშსაც წარადგენს.

"რადიკალურმა ოპოზიციამ იცოდა რა, რომ ამ თვის ბოლომდე წერილობითი ანგარიში უნდა წარმოდგენილიყო პარლამენტში და შემდეგ თვეში ისედაც უნდა წარმოდგენილიყო პრემიერი პარლამენტში და ვრცელი ანგარიში გაეკეთებინა, გამოიძახეს ინტერპელაციის წესით, მაგრამ არც ეს არსის პრობლემა", — აღნიშნა მდინარაძემ.

პრემიერმინისტრმა გიორგი გახარიამ დღეს, 15 მაისს, განაცხადა, რომ მზადაა საგანგებო მდგომარეობის დროს ქვეყნის მართვასთან დაკავშირებით დაგროვილ კითხვებს ნებისმიერი ფორმით უპასუხოს, მათ შორის, პარლამენტში. მან ასევე აღნიშნა, რომ ასეთივე მზაობა აქვთ მთავრობის სხვა წევრებსაც.

"მე მესმის და მსმენია, რომ საზოგადოებაში დაგროვდა გარკვეული კითხვები, საინტერესო კითხვები და მათ შორის აბსოლუტურად ობიექტური კითხვები იმასთან დაკავშირებით, თუ როგორ მოქმედებდა მთავრობა საგანგებო მდგომარეობის პირობებში და ამ კითხვებზე პასუხების გასაცემად მინდა განვაცხადო მზაობა როგორც ჩემი პირადად, ასევე მთავრობის თითოეული წევრის, ნებისმიერი სახით, პარლამენტშიც მათ შორის", — თქვა მან.

გახარიამ პარლამენტის თავმჯდომარე მიმართა, რომ როცა საკანონმდებლო ორგანო საჭიროდ ჩათვლის, მთავრობა ეახლება და დეტალურად წარუდგენს ანგარიშს, როგორ მართავდა ქვეყანას საგანგებო მდგომარეობის პირობებში.