დაავადებათა კონტროლის ცენტრის გადამდებ დაავადებათა დეპარტამენტის ხელმძღვანელი ამბობს, რომ ამ ეტაპზე, მოიაზრება საზოგადოებრივი ტრანსპორტის მინიმალური დატვირთვით მუშაობა. ხათუნა ზახაშვილის თქმით, აღდგენის პროცესი იქნება ეპიდსიტუაციის გათვალისწინებით.

"მთელი ეს აღდგენის პროცესი მოხდება აუცილებლად იმ ეპიდსიტუაციის გათვალისწინებით, რაც წარმოიქმნება ყოველდღიურად და შეიძლება ყოველდღიურ ცვლილებებთან იყოს დაკავშირებული. [...] ამჟამად, როგორც ჩემთვის ცნობილია, მოიაზრება საზოგადოებრივი ტრანსპორტის მინიმალური დატვირთვით მუშაობა, რაც გულისხმობს ადამიანთა შეზღუდული რაოდენობის ყოფნას საზოგადოებრივ ტრანსპორტის შიგნით და მგზავრების მიერ პირბადეების გამოყენებას", — თქვა ზახაშვილმა დაავადებათა კონტროლის ცენტრის წარმომადგენლების ერთობლივ პრესკონფერენციაზე.

ამასთან, მისივე ინფორმაციით, თუ საზოგადოებრივი ტრანსპორტის ამუშავების შემდეგ იქნება შემთხვევების მატება, შეიძლება შეზღუდვები კვლავ დაწესდეს.

"ნებისმიერი ცვლილება, საზოგადოებრივ გადაადგილებასთან ერთად, არის ასოცირებული შესაძლო რისკების მატებასთან და თუ ამ რისკების მატების შედეგად დადგა დღის წესრიგში დაავადებათა შემთხვევათა მატება, რომელმაც შეიძლება რისკი შეუქმნას საზოგადოებრივ ჯანმრთელობას, შეიძლება უკუსვლების გაკეთება მოგვიწიოს და საზოგადოებრივი ტრანსპორტის გადაადგილებაზე კვლავ ამა თუ იმ შეზღუდვების დაწესება", — აღნიშნა მან.

NCDC-ის წარმომადგენლებს კონკრეტულ თარიღებზე არ უსაუბრიათ, თუმცა უწყების ხელმძღვანელმა, ამირან გამყრელიძემ თქვა, რომ ამ საკითხს ცალკე მთავრობის სხდომა მიეძღვნება

"საზოგადოებრივი ტრანსპორტის ამუშავება არის მობილობის ყველაზე უფრო დიდი მოცულობით გაფართოება ქვეყანაში, რაც გარკვეული მომატებული რისკია ინფექციის ზრდისა, ამიტომ ამაზე მიმდინარეობს მსჯელობა, ამას მიეძღვნება ცალკე მთავრობის სხდომა და მიღებული იქნება გადაწყვეტილება", — აღნიშნა გამყრელიძემ.

ხათუნა ზახაშვილმა კერძო ავტომობილებით მაქსიმუმ სამი ადამიანის გადაადგილების შეზღუდვის შესახებაც ისაუბრა და აღნიშნა, რომ ეს წესი ტაქსებისთვის უფრო ხანგრძლივად იქნება შენარჩუნებული.